200 serrî yo sernêkewtî, nika qet nêkewenî

Artêşa Tirkî 27ê Gulane ra nata yo ke hêrişê Başûrê Kurdîstanî kena û hewl dana Başûrî dagîr bikera. Operasyono ke nameyê Pençe dîyayo ci, 2 aşmî xo pey de verdano. Îdareyê Herêma Kurdîstanî zî destek dano operasyonî û herême de dewî yenî vengkerdene.

Pisporê Rojhelatê Mîyanênî Faîk Bûlûtî derheqê operasyon û destekê îdareyê Herêma Kurdîstanî de qisey kerd. Bûlûtî da zanayene ke Tirkîya seba amancêk nê operasyonî domneno û wina va: “No amanc zî Şengal ra heta Heleb, Mûsil zî tede dagîrkerdişê pêroyîya Başûrê Kurdîstanî yo. Labelê ewja de heme çî goreyê Tirkîya nêbeno. Mesela ewja de 15-16 rêxistinê çeteyî estî. Reyna ewja de Îran, Sûrîye û QSD estî.”

Bûlûtî va ‘Tirkîya ewnîyaye ke nêşêno bi şîyayîş û ameyîşî û reyna bi hewa ra bombardûmanan reyde netîce bigîro, nika hewl dano her dîyan bikero yew. Hem hêriş keno û hem zî hewl dano ewja de qereqolan awan bikero. Wazeno ewja de karê ajankerdişî bidomno. Wexto ke şar qebul nêkerd, o wext dewijan ewja ra vejeno. Îdareyê Kurdîstanê Federe yê Îraqî zî na rewşe ver eciz o. Îdareyê Kurdîstanî seba ke îqtîdarê xo bigîro bin temînatî, Tirkîya de hemkarîye kena.”

Peynîya nê karî çin a

Bûlûtî peynîya qiseykerdişê xo de wina va: “Seba ke operasyono yewin yê Pençe sernêkewt, Tirkîya lazimîye bi dîyine dî. Peynîya nê karî çin a. 10 serrî zî 20 serrî zî wina bikero, nêşêno netîce bigîro. Eke 150-200 serrî yo ke polîtîkayêk sernêkewta, nika qet sernêkewena. Çiqas derg bibo, hende zirar dano her di hetan. Labelê nêyî do rojêk fam bikerî. Erdogan prosesê çareserîye ra ver fermandaran ano têhet û înan ra vano ‘şima şîyayîşî ra memnun î?’ cewabê ‘nê’ gêno. Erdogan vano ‘o wext ma do metodanê cîyayan biceribnê’. Ez bawer kena ke do rojêk Erdogan yan zî keso ke bikewo herinda ci, nê vatişî bîyaro xo vîr.”

FERHAT ÇELÎK / MA / STENBOL

Yazarın diğer yazıları

    None Found