Analîz: Hesabê Şima û Kobanê

Tena polîtîkaya Tirkîya, no xusus de zelal nîya. Hedîseyê Kobanî dima, Serekomar Tayîb Erdogan yewna hewa, Serekwezîr Dawûtoglû û wezîrê ey yewna hewa qalî kenî. Her sere ra yew veng vejîno. “Verê vatnê; Meseleya Sûrîye meseleyêka ê zerrî ya.” Eyro zî vanê; “Çi eleqeyê Kobanê û prosesê çareserî esto?” Verê vatnê “Kobanê nizdî ra ko bikewo.” Nika vanê; “ PKK û DAIŞ eynî yî” dima zî vanê ; “PYD û PKK eynî yî.” Serekwezîr Ahmet Dawûtoglû zî vano “Ma nêwazenê Kobanê bikewo. Ha Kobanê, ha Pirsûs.” Nika zî peşmergeyan rê behsê akerdişê yew korîdorî kenî. Seba çaresrî aqilmendan reyra kombîyayîşan organîze kenî. Na yew gam baş a. La ganî bi leza-lez yew pratîk zî bibo.
DAIŞî dormareyê Kobanê girewto, wazeno ke, kurdanê Kobanê qetlîam ra vîyarno. Heme kes zano ke DAIŞ, yew rêxistinêko faşîst o. Merkezê nê rêxistinî de, merdimî Sedamî estî. Komûtaya cengê DAIŞî, nê merdimî îdare kenî. Nê merdiman Helepçe de bi des hezaran kurdî qetl kerdî. Nika zî gonîya kurdan firkî zî rehet nêbenî. Nê çeteyê, merdiman serebirnenî, cinîyan bazan de roşenî. Şima pabebî ke Kobanê bikewo û şima zî şêrî Rojawan de ‘Heremo Tampon’ awan bikerî. La hesabê şima nêtewişt.
DAIŞ; bi sentezê nîjadperestîya ereban û sunîtîy ser o awan bîyo. Nê çeteyî sey heme serdestanê Rojhilatê mîyanênî, dînê îslamî xo rê kenî alet. Uslûb û terzê înan de bê ehlaqey esta. Verfekê DAIŞî, bi namebê xelîfeyê înan, Amerîka û dewletanê bînan tehdît keno û vano ke; “Ma zorê şima benî û cinîyanê şima bazaran de roşenî.” Na yew bêehlaqî ya. Yew het ra lîderê nê çeteyan, xo se xelîfe veyneno, yewna het ra zî behsê rotişê cinîyan keno. Binê naki ra cêr mesajan danê şaranê Amerîka, Ewropa û heme şaranê dinya; bi kiştiş û serebirnayîş û rotişî tehdît kenî. Şarê dinya, ganî vera nê wahşetê nê çeteyan bêveng nêmanî, YPG û şarê Kobanê rê ardim bikerî. No yew wezfeyo însanî û ehlaqî yo.
Berpirsîyarê Tirkîya wardenî-roşenî vanê ke; “Ma bîrîndaranê înan, nêweşxaneyanê xo de tedawî kenî, ma 200 hezar kobanêjî girewtî xo mîyan.” 20 mîlyon kurdî hemwelatîyê şima yî. Bacê xo danî, şima rê leşkerî kenî. Şima neft û elektrîk û heme tewir madenê welatê înan ra îstîfade kenî. Yewna het ra Ewropa ra, Amerîka ra ardim zî yeno kurdanê koçberan rê. Yewna het ra zî şaredarî û sazîyê kurdan zî seba nê koçberan seberber bîyî. Ha Kobanê, ha pisûs. Xora nê kurdî ameyê welatî xo. Nê 38 rojî yo ke hem kurdî, hem zî heme dinya vanê ke, yew korîdor biakî. Eke şima 20 mîlyon kurdan hemwelatîyê xo qebul kenî, yew korîdor biakî. Eke şima hima zî vera nê qatlîamî de çîy nêkî, tarîx şima esla ef nêkeno. Şima wardenî-roşenî behsê çareserî û pêameyîşî kenî. Eyro zemênê çareserî û pêameyîşî esto. Keremkî hinê polîtîkaya xo zelal bikî û nê korîdorî zî hinê biakî.


Mamosta SILÊMAN

Yazarın diğer yazıları

    None Found