Bêrê ma seba aştîye têbigêrî

Dayîkanê dolbendsipîyanê ke hîrê rojî verê vernîya banê AKPyî de seba aştîye çalakîya roniştişî viraşte, hetê polîsan ra bi derbkerdişî ameyî tepiştene. Nê dayîkan ra Aysel Tûfana ke demêk tepişte mende, derheqê qewimîyayîşî de qisey kerde.

Dayîke Tûfane va ‘Ma 11 dayîkanê dolbendsipîyan seba haştîye waşt ke vernîya banê AKPyî de ronişê’ û wina dewam kerde: “Gama ke ma resayî verê banê AKPyî polîsan dormeyê ma girewt û hêrişê ma kerd. Ma erdî ra kirantî û tepiştî. Polîsan vernîya banî de û wesayît de ma rê îşkence kerd. Nêngî ke ma rê çînayî, heqaretê ke ma rê kerdî, nînan ra ma şarmîyayî la ê nêşarmîyayî.”

Dayîke dewamê qisekerdişê xo de va ‘Ma zî domanê ke vînîbîyaye û tepişte yê, ma înan wazenê’ û wina domnaye: “Polîsan bi hawayêkê wehşî hêrişê ma kerd û ma tepiştî. Polîsan ma derb kerd û ma ra va ‘Eke şima linganê xo derg bikerê ma do linganê şima bişiknê’. Wa her kes naye hol bizano ke ma polîsanê Erdoganî ra nêtersenê.”

Herinda ke goşdarî bikerî, hêrişê ma kerd

Dayîke Tûfane vist vîrî ke Serokkomar Erdoganî dayîkê ke vernîya banê HDPyî de yê pîroz kerdî û dayîkê ke aştîye wazenê dayî tepiştene. Dayîke Tûfane wina qedênaye: “Keyeyê ke vernîya banê HDPyî de wa bêrê ma pêro pîya vernîya banê AKPyî de ronişê. Ma nêwazenê ke kes bimiro. Ma aştîye wazenê. Ma wayîrê îradeya xo vejîyenê. Ma zî dayîk ê. Zerrîya ma zî vêşena. Soylû û Erdogan bi hêsiranê sexteyan dejanê dayîkan goreyê menfeatanê xo şuxulnenê. Ey Erdogan, ma ameyî verê banê to bîyê memanê to. La to herinda ma goştarî bikerî de polîsanê to hêrişê ma kerd. AKP adirê şerî gur keno. HDP her tim semedê aştîye û huzûrî têkoşîn dano. Wa ê dayîkî bêrê ma pêro pîya seba aştîye têbigerê.”

AMED

Yazarın diğer yazıları

    None Found