Bêvengîye hemparî ya bêveng memanê

Îqtîdarî dest ser na şaredarîyanê Amed, Wan û Mêrdînî û ê cayan rê qayûmî tayîn kerdî. HDPyî vera tayînbîyayîşê qayûman de reaksîyon nîşan da û wina va: “Misqalêk bo zî meşrûîyetê îqtîdarî nêmendo. Şarê ma qetîyen nê kerdişan do qebul nêkero û do wayîrê îradeya xo bivejîyo. Ma do nêvinderî û bêveng nêbî.”

Vizêr saetanê şewe de polîsan eşt şaredarîyanê bajarê girdan yê Amed, Wan û Mêrdînî û xesp kerdî. Wextê sereştişî de ame dîyayene ke hetê Wezîrîya Karê Zereyî ra qerarê tayînkerdişê qayûman ameyo girewtene.

Reyna vernîya her 3 şaredarîyan zî bi barîyeranê polîsan ame girewtene û kewtiş û vejîyayîşê şaredarîyan de kontrolî ameyî ronayene. Heto bîn de polîsan eşt xeylê keyeyan ser û bi seyan kesî tepiştî.

Ame musayene ke 29 bajaran de pêro pîya 418 kesî ameyî tepiştene.Kesê ke derheqê înan de qerarê tepiştişî esto mîyan de Hemserekê HDPyî yê Amedî Hulya Alokmene û Zeyyat Ceylan zî estî. Polîsan eşto keyeyê her di hemserekan ser, labelê seba ke ê keye de nêbî, nêameyî tepiştene. Reyna Îdarekarê HDP û DBPyî, rojnameger, xebatkarê şaredarîyan, endamê Kongreya Îslamo Demokratîk, endamê Meclîsê Şaredarîye û sewbîna kesî zî ameyî tepiştene.

Hemserekê Şaredarîya Bajarê Girdî ya Amedî Selçûk Mizrakli û parlamenterê HDPyî vernîya şaredarîye de îzehetêk da çapemenîye û Mizrakliyî derheqê karî ra eştişê xo de reaksîyon nîşan da. Wexto ke teblîgan ci rê erşawîya, teblîgatî îmze nêkerd û da zanayene ke îmzekerdişê teblîgatî yeno manaya qebulkerdişê bêrûmetîye. Mizrakliyî va ‘19ê Tebaxe de heme erjê demokrasî, rejîmê huqûqî, mefhûmê edaletî û îradeya weçînitoxan heme girîyayî binê lingan’ û wina domna: “Mi ra waştî ke ez belge îmze bikera, teqez çîyêko winasî goreyê mi bêrûmetî yo. Nameyê nê xespî erdlerz o, Erdlerzê 19ê Temmuze yo. No erdlerz do sîyasetê Tirkîya de texrîbatêk bivirazo. Ma verê cû dîbi ke qayûman se kerdbi bi bajaran. No problemê herkesî yo. Kesê ke nê qerarî girewtî, do rojêk hetê şarî de mehkûm bibî. Kesê ke hetê şarî ra nêameyî weçînayene, meşrûîyetê înan çin o. Ê heta nika qet sernêkewtî, do sernêkewî zî.”

Merdim nêşêno bi aqil û mantixî îzeh bikero

Wezîrîya Karê Zereyî Şaredarîya Bajarê Girdî ya Mêrdînî rê zî Walî Mûstafa Yamanî qayûm tayîn kerd. Seke yeno zanayene Yaman reya dîyine ya ke yeno tayînkerdene û reya verêne pey xo de xeylê deyn verdabi. Hemserekan ra Ahmet Turkî vera tayînbîyayîşê qayûman de reaksîyon nîşan da. Turkî dîyar kerd ke merdim nêşêno bi aqil û mantixî nînan îzeh bikero û wina va: “Ma donemêko ke huqûq çin o û neheqîyî resayî dûştê tewr berzî de cuyenî. Îradeya şarî xesp kenî û ci ra vanî demokrasî. Heme çî eşkera yo. Sîyaset yeno kerdene, dîyar beno. Çîyê ke benî teberê huqûq û qanûnan de yî.”

Bi hawayo eşkera derbe yo

Heyetê Berzî yê Merkezî yê HDPyî zî qerarê qayûmî ra dima bi hawayo lez kombîyayîş viraşt. Kombîyayîş ra ver îzehetêk dîya çapemenîye. HDPyî sernuşteyê îzehetê xo de vato ‘ma do nêvinderî û bêveng nêmanî’ û wina domnayo: “Tayînbîyayîşê qayûman eşkera derbeya sîyasî yo. Misqalêk bo zî meşrûîyetê îqtîdarî nêmendo. Çimkî no îqtîdar wexto ke sindoqan de vinî keno, hewl dano îradeya şarî xesp keno. Şarê ma qetîyen nê kerdişan do qebul nêkero û do wayîrê îradeya xo bivejîyo. Ma veng danî hêzanê demokrasî û wayîrê wijdanan û heme muxalefetî ke wa vera nê îqtîdarî de piştîdayîşyewbînan bikerî. Vera nê îqtîdarî de têkoşîn dayene heq o. Ma ancax bi no qeyde eşkenî serbikewî. Bêveng memanê, bêvengîye tesdîqkerdiş o.”

AMED

Yazarın diğer yazıları

    None Found