Cigêrayîşê Pirsusî ame red kerdene

14ê Hezîrane de qezaya Pirsusî ya Riha de parlamenterê AKPyî yê Riha Îbrahîm Halîl Yildiz û merdimê ci hêrişê keyeyê Şenyaşarî kerdbî û netîceyê hêrişî de 4 kesî merdbî. Heta nika derheqê hedîseyî de ti averşîyayîşêk çin o.

Wekîlê Serekîye yê Grûba Meclîsî yê HDPyî Fatma Kurtulane û Ayhan Bîlgenî derheqê hedîseyî de pêşnîyaza cigêrayîşî dayî Meclîs. Pêşnîyaz de wina ameyo vatene: “Pirsus de 10 rojî weçînayîş rê mendbî, hewl dîya provokasyon bêro vetene. Netîceyê hedîseyî de 4 kesî merdî. Ganî no hedîse heme hetanê xo ra bêro cigêrayîş kerdene. Ganî komîsyon dest bi xebatan bikero.” Pêşnîyazê HDPyî hetê rayanê AKPyî ra ame red kerdene.

Heto bîn ra avûkata doze Sevda Çelîk Ozbîngole derheqê doze de melumatî dayî. Ozbîngole dîyar kerde ke herçiqas ke ê îtîrazê doze kerdî, labelê qerarê nimiteyî dewam keno û wina domnaye: “Heta nika derheqê şîyayîşê doze ti melumat nêdîyeno ma û doze zaf giran domîyena.” RIHA

Yazarın diğer yazıları