Dengbêjî pawitişê ercan a

DENÎZ ÎKE / ANF / AMED 

Xeylî neteweyê Rojhelatê Mîyanênî hetê kultur, ziwan û muzîkê şarî ra wayîrê dewlemendîyêkî yê. Nê neteweyan ra yew zî bêguman Kurd ê. Rîyê polîtîkayanê asîmîlasyonî yê dewleta Tirkî ra xeylî eserê kulturî yê Kurdî ameyî talankerdene.

Beno ke dengbêjê sey Şakiro, Zahiro, Karapêtê Xaço, Meyremxane, Eyşe Şane ûsn. bêrê naskerdene, la xeylî dengbêjê sey Mistefayo Kor, Seyîdxano Kal, Mistefayê Xeloyê Heyran û Resoyê Ûsiv zaf tay yenê naskerdene. Selahattîn Ûçûrûmî (64) dengbêjî ser o qisey kerd.

Ûçûrûmî da zanayene ke ey emrê xo yê domanîye de dest bi dengbêjîye kerda û wina qala hîkayeya xo kerd: “Ez serra 1952î de dewa Bayîkî ya pabesteya Farqînî de ameya dinya. Kalikê mi eslê xo Îdir ra yo û bi serewedartişê Agirî de koçê Mûşî kerdê û dima ra ma dewa Farqînî de bica bîyê. Ez emrê xo yê qijkekî de Apê Resûlî ra dengbêjîye mûsaya. Ez hewna 12 serre bîya ke degnbêjê dewe ameyêne pêser û şewbêrke viraştêne. Temamê dewijan dorê dengbêjan de ameyêne pêser. Vengê Apê Resûlî a game mi ser o tesîr kerd û mi dest bi dengbêjîye kerd. Eke merdimî xorînîya zerrîya xo ra hîs bikerê eşkenê dengbêjîye bikerê û nê hunerî de rol bigêrê.”

Dengbêjîye bidomnê

Ûçûrûmî bale ante serê dereceya muzîkê Kurdî ser û wina va: “Dereceya muzîkê Kurdî goreyê wextanê verî xeylî kewta, çunke verî merdiman dej, cuye û destanî bi dengbêjîye îfade kerdêne. La ma ewro ewnênê cimatê xo ra û vînenê ke xoşibênayîş virazîyo. No beno sebeb ke kulturê ma bêro kiştene. Ez veng dana heme dengbêjan ke nê kulturî rê wayîr vejîyê û bimûsnê ciwanan. Dengbêjî tarîx o, kultur o û estbîyayîş o. Estbîyayîşê xo rê wayîr bivejîye.”

Yazarın diğer yazıları

    None Found