Derbeya 12ê Êlule bi AKP dewam kena

Vervatoxê Tevgerê 78an Celalettîn Cano ke şahidanê derbeya leşkerî ya 12ê Êlule yo, va ‘Derbeya 12ê Êlule bi AKP dewam kena’ û wina domna: “12ê Êlule sey bangerêk welatî ser o derbas bi û ewro hîna zî dewam keno. Ewro AKP zî bi derbeyan miqate beno. Ma eşkenî hesabê Derbeya 12ê Êlule bipersî.”

ERDOGAN ALAYÛMAT /MA / STENBOL

Emser serrgêra 39. ya Derbeya Leşkerî ya 12ê Êlule ya. Derbeya leşkerî ya 12ê Êlule ver 750 kesî kişîyabî, 50 kesî ameybî îdamkerdene, 7 hezar kesî bi îdamî ameybî mehkemekerdene, 650 hezar kesî ameyî tepiştene û mîlyonêk 683 kesî ameyî deqkerdene. Şahidanê derbe ra yew zî Vervatoxê Tevgerê 78an Celalettîn Can o.

Celalettîn Canî da zanayene ke derbeya leşkerî ya 12ê Êlule ewro bi destê AKPyî dewam kena.  Canî va ‘merdim nêşêno bi hûmaritişî texrîbatanê derbe biqedêno’ û wina dewam kerd: “12ê Êlule sey bangerêk welatî ser o derbas bi û ewro hîna zî dewam keno.”

Canî dewamê qiseykerdişê xo de wina va: “Înan o wext seba ke zemînê derbe amade bikerî, Çorûm, Gurgum, Bahçelîevler û Beyazit de qetlîyamî ameyî viraştene. Wexto ke tarîx bi 12ê Êlule leşkeran dest rona îdareyê welatî. Ewro hîna zî tesîrê derbe dewam keno. Derbe ra dima qanûno bingeyîyêk ame amadekerdene. Dima ra heme azadîyî ameyî wedarnayene. Îqtîdaro ke derbe ra dima ame heme çî goreyê xo bedilna.”

Derbeya 12ê Êlule dewam kena

Canî va ‘39 serrî derbe ser ro derbas bîyî, labelê Tirkîya de çîyêk nêbedilîya’ û wina domna: “Tirkîya de hende serran de çîyêk nêbedilîya. 12ê Êlule ra dima enkazê mend û ewro hîna zî no enkaz welat de esto. Seba ke hesabê derbeyanê 1961 û 1971î nêame perskerdene, derbeya 12ê Êlule bî. Reyna seba ke hesabê derbeya 12ê Êlule nêame perskerdene, 28ê Sibate û 15ê Temmuze de derbeyê bînî ameyî kerdene. Ewro derbeya 12ê Elule bi AKP dewam kena. Ewro AKP zî bi derbeyan miqate beno. Erdoganî derbe ra dima va ‘No lutfê Homayî yo’  û no zî nîşan dano ke senî derbeyan ra miqate beno. Heme heq û azadîyî ameyî qedexekerdene. Bi desan dezgehî, rojname, kovare, û ajansî ameyî padayene. 125 hezar ra zêde kesî ameyî îxraçkerdene.”

Seba çîyêk erey nîyo

Canî peynîya qiseykerdişê xo de va ‘seba çîyêk erey nîyo’ û wina qedêna: “Ma hîna zî eşkenî hesabê Derbeya 12ê Êlule bipersî û îqtîdar eşkeno têrî bimano. Seba nêyî ganî hêzê demokrasî bibî yewe. Ganî qanûno bingeyî yê 12ê Êlule bêro bedilnayene û qanûno bingeyîyêko newe bêro awankerdene. Eke no nêro kerdene, ma do binê enkazê derbeyan de bimanî.”

Yazarın diğer yazıları

    None Found