Elewîyî reyna benê hedef

Federasyonê Elewîyanê Demokratîkan (FEDA) derheqê hêrişê vera endamê Heyetê Caardişî yê Cemxaneyê Duzgun Babayî yê Qisle Hakki Aradagî de îzehetêko nuştekî da û bale ante Elewîyê demanê peyênan de reyna benê hedefê hêrişan ser.

FEDA îzehetê xo de vato ‘cayanê bimbarekan ê Dêrsimî ra Merkezê Ocaxê Kureyşanî yê Qisle ya Dêrsimî de keyeyê yew canê ma hedef girîyayo û hewl dîyayo rayîrê xo ra bi zorî biagêro’ û wina dewam kerdo: “Çîyo winasî nêno famkerdene. Wijdanê ma naye qebul nêkeno.”

FEDA dewamê îzehetê xo de wina vato: “Keyeyê her Elewîyî cemxaneyêk o. Kam ke vano ‘ez Elewî ya’ sebeb çi beno wa bibo nêeşkeno bierzo keyeyêk ser. Bêriza çew nêeşkeno bikewê cemxaneyî. Ma tarîx ra zanê ke kamî beranê Elewîyan nîşan kenê û kamî erzenê bananê Elewîyan ser. Ma xo vîra nêkerdo û ma do çirey xo vîra nêkerê.”

Îzehet de ameyo vatene ke hêrişê vera Elewîyan de benî demanê peyênan de zêdîyayî û wina dewam domîyayo: “Demanê peyênan de bi medotanê cîya-cîyayan vera Elewîyan de hêrişî yenê kerdene. Yeno waştene ke Elewîyî xo mîyan de têmîyan bikewê û yewbînan ra bibê cîya. Elewîyê ke vera yezîdan hetê mazlûman de loqmeyanê xo yê heqî pare kenê, reyna benê hedefê hêrişan. Dewlete verê Dîyanet eşt dewre û waşt ke bi pereyî Elewîyan bixapêno. Eynî wext de berê serekanê cemxaneyan ameyî nîşankerdene. Reyna tam nê wextî de Dêrsim de no hêriş bi. No yeno na mana ke dewlete vana şima sey ma nêkerd, verê ma de çok nêda, ma zî bizorî sey xo kenê. Wa herkes bizano ke ma dewaya xo ra fek veranêdanê. Ma do vera zîhnîyeto ke wazeno Elewîyan lete bikero û asîmîle bikero de xover bidê û ser bikewê.”

PÎRHA / STENBOL

Yazarın diğer yazıları

    None Found