Erdogan bi hîsanê keyeyan kay keno

Serekwekîlê Grûba HDPyî Sarûhan Olûçî derheqê qayûm û qewimîyayîşê provokatîfî yê vernîya banê HDPyî yê Amedî de qisey kerd û hişyarîyê muhîmî kerdî. Olûçî qerarê qayûman sey qerarêko sîyasî name kerd û vera qayûman der reaksîyon nîşan da.

Olûçî va ‘hema cipersayîş nêamebi akerdene ke îradeya şarî ame xespkerdene’ û wina domna: “Xeberê qayûmanê neweyan ma rê xerîb nêyê. Wezîrê Karanê Zereyî goreyê keyfê xo qayûman tayîn keno. Hukmat çîyo ke sindoqan de vînî kerd nika bi zext û şîdetî wazeno dest bifîno.”

Olûçî bale ante hêriş û provokasyonanê vera HDPyî de ser û wina dewam kerd: “Keyeyê ke vernîya banê ma yê Amedî de yê, ma dejê înan fehm kenê. Seba ke dayîkê Kurdîstan û Tirkîya mebermê ma têkoşînê azadîye û haştîye danê. Dejê Dayîkanê Şemeyî, Dayîkanê Haştîye û dayîkê ke vernîya banê ma de ronîşenê tewr hol ma fehm kenê. HDP têkoşîn dano ke ê hîna zaf dej meancê. Ê ke no şerî xorî kenê AKP û MHP yo. Îqtîdarî heme rayîrê çareserîye werte ra wedartî û polîtîkayê şerî vistî dewre. Eke keyeyî wazenê biresê qicanê xo wa şirê vernîya merkezê AKPyî de çalakîye virazê. Ma her tim semedê çareserîye amade yê. Erdogan di rojî cuwa ver paştî daye keyeyanê ke vernîya banê ma de yê. Ma dejê keyeyan zaf hol zanê la Erdogan bi hîsanê keyeyan kay keno. Hesranê sexteyan keno war. Dejê keyeyan xêmê Erdogan û AKPyî de nêyo. Ê dej û hesaranê dayîkan semedê îqtîdarê xo binpay kenê.”

ANF / AMED

Yazarın diğer yazıları

    None Found