Esrarê Deyîr

Serran ra avê bî. Nêzon, tam vîra mi de nêmendo, kamij serre biye.

Hen kav ken ke jû festîval bî. Jû xort ame lewê mi, selam da û vat: “Heval Qemer ez zî muzîk sero gureyen û eke xo kerd amade, yen programê to.”
Namê xo zî vat tabî: Adem Karakoç. Ora dima ma jûvînî xêle reye dî, her dem muzîk ser qesey kerd.
Adem qeza Xarpêt Xulaman (Alacakaya) ra wo. 12 serrîyo weşîya xo Îsvîçre de rameno.
Tabî însanê ke muzîkê zazakî rê laqadar benê, Adem rewra naskenê. Xêle kilamê xo înternet de estê.
Naye bizonîme ke xerîbîye de, gosdaranê xora dûrî, piyasa muzîkê xora dûrî, album vetene honde rehet niya.
Heto bîn ra zî kes destê vengê neweyî nêceno, yanî cirê yardim nêkeno. Hama mesela ma ewro sazî û dezgê ma nîyê, albumê Adem yo.
Ez bîne sa, albumê Adem bi name “Lêlawe” heşto peye rest destê mi. Mi hora meraq kerdenê, ala honde serrî ra tepiya Adem sene album vezeno. Ver ra naye vajîne ke, xeyalê mi nêşîkiya. Gorê mi Adem karode rind kerdo. Tabî ez ekspertê muzîk niyu, teyna gosdaru û hîsanê xo an ra zon.
Adem muzîkê marê helm û vengode newe, sedade vêsayîye ardê. Hen omid ken ke, hometa ma na seda vêsayiye gosanê xorê kena meyman.
“Esrarê Deyîr” de  Adem rê dawilan de Sonya Boesnach, kontrabas de Stefan Mattîg, gîtaran de Alessîo Cazzetta û tembur de Tarık Ordu refaqat kenê.
Albumê Adem de 10 kilamî ca cenê. Nînan ra hora 3 hebî yê Adem niyê. Nînan ra “Gulam” û “Demirvaj” anonîm yê. Kilama “Hazir û Nazirê Kamî ya” hetê Tornê Tujî ra nuşiya, Adem cirê qeyde virasto.
Kilamê bîn zî pêro qelem û qirtika Adem ra vejiyê. Album Îsvîçre de “Unit Record” ra vejiyo.
Adem waxtede vat bî, o wazeno album vezo. Nika ey karê xo kerd. Nika endî her çî ma gosdaran dest dero.
Gune cirê wayîr vejîme.
Bi taybetiye naye ra tepiya gune sazî û dezgê ma na vengo newe rê yardim bikerê û naskerdene dê.
Vengê Adem, vengê daristan yo, vengê koyan o, medenî niyo. Ma beno welat, ma beno domoniya ma, keno xort.
No veng Adem ra vejiyo endî biyo vengê ma.

Yazarın diğer yazıları

    None Found