Estena Kurdan bi 15ê Tebaxe qebul bî 

Komîteya Caardişî ya PKKyî: dîyar kerdo ke ê do bi hawayo bicoş 15ê Tebaxe pîroz bikerê û wina dewam kerdo: “Nameyê Kurdan saya 15ê Tebaxe de ame zanayene. Ma veng danê ke wa Roşanê Xoverdayîş û Ganîbîyayîşî yê 15ê Tebaxe heme wareyan de bicoş bêro pîrozkerdene.”

15ê Tebaxa 1984î de qezaya Dihê ya Sêrtî de vera qereqolê dewleta Tirkî de çalakîya sifteyîne ameybî viraştene û na roje hetê Tevgerê Azadîya Kurdan ra sey Roşanê Ganîbîyayîşî yena pîrozkerdene. Babete ser o Komîteya Caardişî ya PKKyî îzehetêko nuştekî da.

Komîteye îzehetê xo de dîyar kerdo ke Hemleya Gerîlayanê Şorişgêrî yê 15ê Tebaxa ke mîladê Kurdan a, kewena serra xo ya 36. û wina vato: “Şerê gerîlayî ke semedê azadîya Kurdîstanî, xeta azadîye ya Rayber Abdullah Ocalanî û fermandarîya Fermandarê Bêmergî yê Egîtî (Mahsûm Korkmaz) de Dihê û Şemzînan de dest pêkerd, 35 serrî yo bêmabên dewam keno. Xoverdayîşê tarîxî şarê Kurdî kerd endamêko bianor ê keyeyê merdimîya azadîye. Na çarçewa de sere de Raber Apo ma roşanê heme hemrayan û şarê xo pîroz kenê. Şexsê Fermandar Egîtî de heme şehîdanê xo yad kenê.”

Komîteya Caardişî dewamê îzehetê xo de wina vato: “Hemleya 15ê Tebaxe rixmê heme astengkerdişan û hêrişan heta ewro bi serkewtişî ameye. Xoverdayîşê azadîye yê 35 serran bedelê girdî dayî, dejê giranî antî û tewr tay 50 hezar şehîdî dayî. La rixmê hêrişanê dewleta Tirkî ya qirkerdoxî şar û Tevgerê Azadîye yê Kurdan her tim bî hêz û serkewt.”

Ware û nasnameyê Kurdan xeyrê xoverdayîşî de ame zaneyene

Komîteye dîyar kerd ke êzaf hol zanê ke xeyrê nê têkoşînî de ewro Kurdan zaf çî fînayî dest û îzehet wina dewam kerdo: “Nika her kes vîneno û qebul keno ke şarê Kurdî zanayîş û ruhê azadîye, fedakarîye, hêzê çalakîye û rêxistine, bawerîya serkewtişî û îradeya cuya azade xoverdayîşê tarîxî yê gerîla û hemleya 15ê Tebaxe ra girewt. Şorişê ganîbîyayîşê neteweyî yê Vakurî, statûyê Başûrî û Şorişê Rojawanî xeyrê nê têkoşînî de bîyî. Ware û nasnameyê Kurdan xeyrê xoverdayîşê gerîlayan de ame zaneyene.”

Gerîlayî derbanê girdan danê dagîrkeran ro

Komîteye îzehetê xod e vato ‘serra 36. de vera faşîzmê AKP û MHPyî de ma sey gerîla û şarî şerê şorişgêrî yê şarî yo topyekûnî her ware de rayra benê’ û wina domnayo: “Gerîlayo ke bi ruhê 15ê Tebaxê bingehê paradîgmaya neweye de xo xeta gerîlayê Apoyî de newe ra aferna, Serhed ra heta Xakurkê, Dêrsim ra heta Mêrdînî heme cayê Kurdîstanî de derbanê girdan dano îşxalkaran ro. Bi na wesîle ma xoverdayîşê tarîxî yê 35 serran ê gerîlayanê xo yê qehremaman pîroz kenê û dewamê serkewtişê înan wazenê.”

Heme hêrişî cewabê xo bigîrî

Komîteye peynîya îzehetê xo de wina vato: “Ma şexsê şehîdê serrgêra 15ê Tebaxe, mîlîtanê PKK û PAJKî û fermandara bêmerge ya HPG û YJA Starî Şevîn Bîngole de heme şehîdanê xo bi vîr anê. Ma reyna vanê ke xeta fermandarîya Apoyî ya ke Fermandar Egîtî ra heta Fermandare Şevîne derg bîye, ma do miheqeq ser bikewî. Ma bawer kenê ke semedê vîrardişê Şehîd Helmet û Şehîde Şevîne do têkoşînêkê qesasî yo bihêz û şorişgêr bêro domnayene û hîna gird bêro serkewtene. Ma reyna vanê ke hemê hêrişê vera ma do bi xoverdayîşê gerîla û şarî cewabêko tewr gird bigêrê. Na çerçewa de ma veng danê ke wa Roşanê Xoverdayîş û Ganîbîyayîşî yê 15ê Tebaxe heme wareyan de bicoş bêro pîrozkerdene.”

ANF/BEHDÎNAN

Yazarın diğer yazıları

    None Found