Ewro welidîyayîşê merdimîye yo

Bi wesîleya 4ê Nîsane rojbîyayîşê Rayberê Şarê Kurdî Abdullah Ocalanî sere de koyanê Kurdistanî, Rojawanê Kurdistanî û xeylê cayan de pîrozkerdişî ameyî viraştiş. Koordînasyonê PAJKî ra Gulçîya Gabare rojbîyayîşî pîroz kerde û wina va: “Rojbîyayîşê Rayber Apoyî, sey welidîyayîşê merdimîye pîroz o.”

Bi wesîleya 4ê Nîsane rojbîyayîşê Rayberê Şarê Kurdî Abdullah Ocalan xeylê cayan de pîrozkerdişî dewam kenî. Nê hetan ra yewe zî koyê Kurdistanî yî. Gerîlayê Têkoşînê Azadîye zî koyanê Kurdistanî de seba ke 4ê Nîsane pîroz bikerî, leyekî ronayî.

Herçiqas ke hêrişê dewleta tirkî dewam kenî zî xeylê hetan de pîrozkerdişî ameyî viraştiş û bi seyan gerîlayî beşdarê pîrozkerdişan bîyî. Çarçewaya pîrozkerdişî de gerîlayan govende girewtî û leyekî ronayî. Koordînasyonê PAJKî ra Gulçîya Gabare zî beşdarê pîrozkerdişî bîye û wina va: “Ewro serrgêra 69. ya rojbîyayîşê Rayber Apoyî yo. Ewro newe ra welidîyayîşê cinîye, şarê kurdî û merdimîye yo. Cok ra ewro wisarê şaran o. Senî ke tebîet xo newe ra gandar keno, merdimî zî ruh û mezgê xo bi rojbîyayîşê Rayberîye 4ê Nîsane de gandar kenî. Cok ra rojbîyayîşê Rayber Apoyî, sey welidîyayîşê merdimîye pîroz o. Ewro tebîet û erdê ma binê dagîrkerîya faşîzmê tirkî de yî. Efrîn bajarê tebîet û cinîye yo. Dagîrkerî tehemulê daranê zeytûnan daxî nêkenî.”

‘Ma do seba her dara Efrînî darêk bironî’

Gabare dîyar kerde ke ê do seba her dara Efrînî darêk bironî û wina domnaye: “Ma her cayo ke tede dare esta, Efrîn îlan kenî. Ma do heme hetê Kurdistanî de daran bironî û heme ca bikerî Efrîn. Heme cayê tebîet û erdî de felsefe û ruhê Rayberîye estî û do hertim bibî zî. Cok ra wa rojbîyayîşê Rayber Apoyî sere de şervanê ke Efrîn de xover danî û heme xoverdakaran rê pîroz bo.” Gerîlayan dima ra pasta tira kerdî, deyîrî vatî û govende girewtî.

Kampa Berxwedanî de pîrozkerdişê 4ê Nîsane 

Heto bîn ra Kampa Berxwedanî ya Şehba de ke bi hezaran efrînijî tede manenî, 4ê Nîsane rojbîyayîşê Rayberê Şarê kurdî pîroz kerdî. Pîrozkerdişî de siloganê ‘Bê Rayberî cuye nêbena’, ‘Bicuye xoverdayîşê Rayber Apoyî’ û ‘Bicuye xoverdayîşê Efrînî’ ameyî eştiş. Pîrozkerdişan de qiseykerdişî ameyî kerdiş û qiseykerdoxan ra ser nameyê Meclîsê Keyeyê Şehîdan Sureya Hebeşe wina va: “Senî ke Rayberîya ma Îmrali de xover dano, ma zî do heta peynî xover bidî. Ma tena kesêk zî bimanî ma do xover bidî.” Qiseykerdişan ra dima muzîk ame cinitiş û govende ameye girewtiş.

Heskerdişê Ocalanî ra tersayî 

Heto bîn ra pîrozkerdişo ke her serre qezaya Xelfetî ya Riha ra girêdaye dewa Amara ya Rayberê Şarê Kurdî Abdullah Ocalanî de yena viraştiş, emser ame qedexekerdiş. No hewteyêk o cendirmeyî dewa Amara de ameyî bicakerdiş û cendirmeyan vizêr 5 kesê ke Hemserekê HDPyî û rojnamegerêk zî tede bî, tepişti. Polîs û cendirmeyan bêxera kesê ke kutukê înan de Xelfetî nuseno, destûr nêda derbazbîyayîşê ti kesî.

Hemserekê KCDyî Berdan Ozturk, tayê parlamenter û welatîyê ke 2 rojî verê ra ameybî qeza, nêşênayî awanîya HDPyî ya qezaye ra bivejyî. Parlamentera HDPyî ya Riha Dîlek Ocalane reaksîyon nîşanê astengîyan daye û rojbîyayîşê Ocalanî pîroz kerde. Dîlek Ocalane va ‘Ma seba şarê xo ke hende zextî estbî zî ameyî rê sipas kenî. Zextî hende zêde bî ke vizêr eştî keyeyê ma ser û 9 embazanê ma tepiştî. Wa rojbîyayîşê Rayberê Şarê Kurdî Abdullah Ocalanî heme şaran rê pîroz bo.”

MERKEZÊ XEBERAN

Yazarın diğer yazıları

    None Found