Ganî ma nîşanê domananê xo bidî

MUSTAFA YUKSEL / PÎRHA / SEMSÛR

Herêma Gisorî ya Semsûrî de cayê ke Kurdê Elewîyî manenî de verê cû cem ameyêne girewtene, labelê nika tena çend dewan de cem yeno girewtene. Xeylê dewan de erkanê rayîrê Elewîtîye zî nîno domnayene.

Dewa Akçali ya ke 20 kîlometre dûrê merkezê Semsûrî de ya de zî wina yo. Bi serran ra ver na dewe de cem ameyêne girewtene û têkilîya pîr û talîban estbî. Labelê ewro cem nîno girewtene û têkilîya pîr û talîban zî qerfîyaya. Dewijan ra Abûzer Erkeneko 80 serrî ke 6 domanê ci estî, qisey kerd.

Erkenekî va ‘ez na dewe de ameya dinya û o wext ra nata ez tîya de cuyena’ û wina dewam kerd: “Ma verê cû gilgil û tutin ronayêne û heywankarîye kerdêne. Verê cû têkilîya merdimîye hîna xurt bî, labelê ewro na têkilî zaf nêmenda.”

Erkenekî va ‘wexto ke ez doman bîya keyeyê Ap Huseyînî de cem ameyêne girewtene’ û wina domna: “Cemî hetê pîranê Ocaxê Uryan Xizirî ra ameyênê îdarekerdene. Înan ma rê qala erkanê rayîrê elewîtîye kerdêne. Verê cû rojeyê Muharrem û Xizirî ameyêne tepiştene. Labelê ewro ti temamê dewe bigêrî, kes roje nêtepişeno. No kultir nêmendo. 40 serrî yo ke dewa ma de cem nîno girewtene. Ganî ma no het de rûtuelanê xo nîşanê domananê xo bidî.”

Yazarın diğer yazıları

    None Found