Ganî polîtîkayê neweyî bibî

Sey ke yeno zanayîş her cayê dinya de roja 1ê Gulane sey Roja Karkeranê Cîhanî yena pîrozkerdiş. Nizdîbîyayîşê 1ê Gulane de amadekarîyê pîrozkerdişê roje yenê kerdiş û seba beşdarbîyayîşê çalakîyan veng yenê dayîş. Karkerê ke ameyî îxraçkerdiş do 1ê Gulane de heqê xo taleb bikerî. 

Babete ser o Unîversîteya Anqara ra Doç. Dor. Mustafa Kemal Coşkuno ke amebî îxraçkerdiş, qisey kerd.

Coşkunî destpêkê qiseykerdişê xo de va ‘AKPyî bi hawayo aşkere reyanê sinifa feqîran tirawit’ û wina dewam kerd: “Goreyê mi sebebê tirawitişê reyan ra yewe zî ekonomî yo. AKP wayîrê sinifa feqîran nêvejîyeno. Eke sinifa feqîran vera AKPyî de sere biwedarna do reaksîyonêko cîddî yê muxalîfan bivejîyo raste. Na rewşe xovero nêbena. Cok ra roja 1ê Gulane zaf muhîm a. Ganî seba ke hetê referandûm de vatî ya biancî xo het, polîtîkayê newe bêrî meşnayîş.” 

Krîz her ke şono kûr beno

Coşkunî dewamê qiseykerdişê xo de bale ant menfîetanê karkeran ser û wina domna: “Seba başîya ekonomî û menfîetan xeylê kesî referandûm de reyê xo dayî AKPyî. La wa baş bêro zanayîş ke piştîdayîş, ekonomî, menfîet û sewbîna çîyî merdiman mird nêkenî. Krîzê ekonomî tesîrê xo heme hetan ser de kerdo. Krîzê ekonomî ver dikanê AVMyan, fîrmayê pîlî û fîrmayê xerîbî ameyî padayîş. Îflaskerdişê fîrmayan nîşan dano ma ke rewşêka çiqas cîddî esta.”

Eşkenî bi asanî karî ra bierzî

Coşkunî qiseykerdişê xo yê peyênan de tazmînatê qidem û 1ê Gulane ser o qisey kerd û wina qedêna: “Ganî karker û xebatkaran rê muhîmîya tazmînatê qidemî bêro vatiş. Wedarnayîşê tazmînatê qidemî yeno manaya wedarnayîşê ewleyîya xebatkaran. Bi no hawa eşkenî xebatkaran bi asanî karî ra bierzî. Ganî 1ê Gulane de talebê tazmînatê qidemî û ewleyîya karkeran bêro kerdiş. Bi no hawa do komel de reaksîyonî bivirazyî.” 

DÎHABER/ANQARA

Yazarın diğer yazıları

    None Found