Ganî tarîxê Kurdan ra biewnîyo

Tarîxnas û nuştox Mehmet Bayrakî serrgêra 21. ya destpêkê Komploya Mîyanneteweyî ser o qisey kerd. Bayrakî va ‘seba ke merdim vejîyayîşê Ocalanî yê Sûrîye ra fam bikero, ganî merdim tarîxê Kurdan ra biewnîyo’ û dayo zanayene ke sewbîna alternatîf Kurdan rê nêameyo verdayene.

ERDOGAN ALAYÛMAT / BARIŞ CEYHAN / MA / STENBOL

Rayberê Şarê Kurdî Abdullah Ocalan 9ê Teşrîna verêne de bi Komploya Mîyanneteweyî Sûrîye ra amebi vetene û netîceyê prosesêkî de 15ê Sibata 1999î de amebi tepiştene. Ocalan aye roje ra nata Giravê Îmrali de tecrîdî de yo.

Ocalanî erjnayîşê xo yê komplo de hertim dîyar kerdo ke komplo de rolê cendirmetîye dîyayo Tirkîya û kayê mîyanneteweyî aşkere kerdo. Ocalanî komplo ra dima qiseykerdiş û pawitişanê xo de tim bale anto amancê komplo ser û dayo zanayene ke amanc gurkerdişê pêrodayîşê Kurd û Tirkan o. Ocalan qiseykerdiş û pawitişanê xo de hertim çîyê ke tarîx de bîyî xo rê esas girewto.

Emser serrgêra 21. yê destpêkê Komploya Mîyanneteweyî yo. Babete ser o tarîxnas û nuştox Mehmet Bayrakî qisey kerd. Bayrakî ‘seba ke merdim vejîyayîşê Ocalanî yê Sûrîye ra fam bikero, ganî merdim tarîx ra biewnîyo’ û wina dewam kerd: “Awanbîyayîşê Komare ra nata destûr nêdîyayo ke Kurdî bi hawayo legal tayê fealîyetanê sîyasî û kulturkî bikerî. Cemîyet, partî, rojname, kovare, komale û sewbîna heme çîyê Kurdan ameyî qedexekerdene, awankarê înan yan ameyî kiştene yan zî erzîyayî zîndanan. Hertim nê hewldayîşê Kurdan ameyî astengkerdene. Coka Kurdan zî hertim bi hawayo îlegal hereket kerdo.”

Sûrîye hertim bîya cayê Kurdan

Bayrakî dewamê qiseykerdişê xo de da zanayene ke heta derbeya serranê 70 û 80î wina ameyo û dima ra PKK dest bi têkoşînê sîlehinî kerdo. Bayrakî qiseykerdişê xo wina domna: “Xora derbeya leşkerî ra dima Kurdî yan zîndan de bîyî mîlîtan yan zî vera xo dayo koyan. Çimkî sewbîna alternatîfêk vernîya Kurdan de çinêbi. Seba ke Tirkîya de şert û mercê rêxistinîya têkoşînê şaran mumkin nêbi, Ocalanî teber de rêxistine kerd. Tîya de linga tewr muhîme Sûrîye ya. Rêxistina Azadîya Kurdan (Xoybûn) ewil Lubnan de awan bîye dima ra derbazê Şamî bîye. Yanî Sûrîye hem vîyarte de hem zî roja ma ya ewroyî de hertim bîya cayê Kurdan.”

Seba menfîetê dewletan Sûrîye ra ame vetene

Bayrakî bale ante Komploya Mîyanneteweyî ser û wina va: “Problemê Kurdan newe ra welidîya. Kurdîstano ke bi 4 parçe de vera Kurdan de tayê îttîfaqî estbîy. Îran de derbeya dînî ra dima zaf çîyî bedilîyayî. Sûrîye, Îran, Tirkîya û Îraqê ke Kurdan de problemê înan estî, no seba Kurdan handîkapêk o. Ganî merdim raşt fam bikero. Nê welatî seba menfîetanê xo û tesdîqkerdişê dewletanê girdan Ocalan Sûrîye ra ame vetene. Şîyayîşê Ocalanî yê Ewropa hemleyêka raşt o. Çimkî vîyarte de roşnvîranê Kurdan zî têkoşînê xo Ewropa de domnayo.”

Îttîfaqê Kurd û Tirkan raştê îxanetî ame

Bayrakî qiseykerdişê xo de va ‘Ocalan Ewropa ra erşawîya Kenya û no planê dewletanê emperyalîstan bi’ û wina dewam kerd: “Bi no hewa hewl dîya mabênê Kurd û Tirkan de pêrodayîş bêro vetene. Kurdan tarîx de 10-15 hezar leşkeran reyde destek da Alparslanî û bi no hawa berê Anatolîya Tirkan rê abi. O wext mabênê Kurd û Tirkan de îttîfaq virazîya û labelê no îttîfaq tayê wextan de raştê îxanetî ame. Roşnvîr û serekanê Kurdan ra Yûsûf Zîya Begî meclîs de vatişê ‘Eke Kurd û Tirkî pîya nêcuyî, o wext aqubetê her dîyan zî dîyar nîyo, nînan ra kamder îxanetê yê bînî bikero, seba her dîyan zî aqubet çin o’ kerdo û o vatiş ewro zî raşt o. Coka ganî seba ke no îxanet bêro wedarnayene, ganî çareserîyêka demokratîke bêra dîyayene.”

Yazarın diğer yazıları

    None Found