Hedefnîşandîyayîşê rojnamegeran sûc o

2 rojî verê Weqfê Cigêrayîşanê Sîyaset, Ekonomî û Komelî (SETA) îzehetêk dabi û bi ê îzehetî rojnamegeran hedef nîşan dabi. SETA îzehetê xo de tayê rojnamegeran bi xeberanê înan eşkera kerdbi. Vera raporê SETA de reaksîyonî her ke şono zêde benî.

Bitaybetî xeylê kesan raporê SETA sey deqkerdişî nîşan da. Partîya Demokratîke ya Şaran (HDP) zî îzehetêko nuştekî da û vera raporî de reaksîyon nîşan da. HDPyî wina vato : “Îzeheto ke ameyo dayene de xeylê dezgeh û rojnamegerî hedef ameyî nîşandayene. No îzehet de name, xebere û parekerdişê rojnamegeranê medyaya sosyale ameyî dayene û SETA bi hawayo eşkera rojnamegerî hedef nîşan dayî.

Çîyê ke beşê netîce de sey pêşnîyaz ameyî dayene zî qasê pêroyîya raporî problemin î. Çîyê ke rapor de ameyî vatene, deqkerdiş o. Bi ê raporî hewl dîyayo hemwelatîyan teşwîqê ajanîye bikerî. Rojnamegerê ke nameyê înan rapor de vîyareno, rojnamegerê qîmetinî yê Tirkîya yî. Nê rojnamegerî xover danî. Rojnamegerî suc nîya, hedefnîşandîyayîşê rojnamegeran suc o. Ma piştî danî rojnamegerê ke nameyê înan rapor de vîyareno. Ma bawer kenî ke nê rojê sîyayî do derbaz bibî û tewr peynî erjê merdimanê rûmetinan bimanî.” 

 MA/ANQARA

Yazarın diğer yazıları

    None Found