Helmo peyên de xo rexne kerdo

Têkoşînê Azadîya Kurdan de xeylê qehremanan gêrayîşê heqîqete de canê xo feda kerdo. Tayê nînan xofedakerdişî zî tay dîyo û sey Mehmet Hayrî Dûrmûşî waşto ke wa mezelê înan ser o deyndar binusîyo. Nînan ra yew zî Brûsk Bazîd o. Brûsk hilma xo ya peyêne de xo rexne kerdo û kêmanîyanê xo ser o vindeto.

TÛFAN DÊRSIM / ANF / BEHDÎNAN

Tarîxê merdimîye de têkoşînê estene û azadîye zaf zehmetin bîyo. Zehmetîya nê têkoşînî ver xeylê kesan nêşênayo binê nê barî de bivindero û hetê dişmenê xo de ca girewto. Tayê merdimî zî bi berpirsîyarîyêka girde têkoşîn dayo û canê xo no oxir de feda kerdo. Nînan wexto ke mergî reyde têrî mendî zî fek doza xo ra veranêdayo.

Kurdîstan de eşqê ganîbîyayîş û azadîye zî bi saya bedelanê qehremanan vejîyayo werte. No bîyo karaktere têkoşînê PKKyî. Karakterê destpêkî yê fedakarîye bi şexsê Mehmet Hayrî Dûrmûşî de resayo zîrve û bîyo peymeyê mîlîtanîye. Dûrmûşî wexto ke şehîd bîyêne, vato ‘Wa mezelê mi ser o deyndar binusîyo’ û no bîyo peymeyê PKKyî. Temsîlkaranê nê ananeyî ra yew zî Brûsk Bazîd (Alî Adlîn) o.

Brûsk Bazîd Bazîd de ameyo dinya û Gabar ra heta Dêrsim, Dêrsim ra heta Zap û Çelê xeylê wareyan de têkoşîn dayo. Brûsk herçiqas ke wextê tasfîye de beşdarê gerîla bîyo zî, hertim kewto pey famkerdişê xeta partî û îdeolojîyê ci. Brûsk nizdîyê 5-6 serrî Dêrsim de mendo û heme hetanê Dêrsimî de ereqê ci esto. Tîya de beşdarê xeylê çalakîyan bîyo û ge-ge birîndar zî bîyo. Brûsk hertim bidîsîplîn hereket kerdo û hertim şertanê cuyayîşê leşkerî esas girewto. Hertim tecrube û cuyayîşê xo neqlê embazan kerdî û wina kerdo ke embazan tena fam nêkerdo, hîs zî kerdo.

Çalakîye serkewena û dişmen şok beno

Brûsk dima ra şîyo Başûr û hertim waşto ke mîyanê çalakîyêka girde ca bigîro. Çimkî hertim xo ra û tecrubeyê xo ra bawer kerdo. Peynîye de waştişê ci bîyo û sey fermandarê baskî beşdarê çalakîya ke vera Qereqolê Rindikê de bêro kerdene, bîyo. Goreyê çalakîye do nîzamîyeya leşkerîye ra bikewî qereqol. 4ê Tebaxe 2012î de çalakîye de dest pêkerda û goreyê çalakîye bi seyan leşkerî ameyî kiştene û sîlehê dişmenî erzîyayî awe. Çalakîye serkewena û dişmen şok beno. Dişmen ne roja çalakîye û ne zî roja bîne nêşêno mudaxaleyê gerîlayan bikero.

Bêtelî ra xo rexne keno

Brûsk na çalakîye de bi hawayo giran birîndar beno û mîyanê sînoranê qereqolî de keweno. Brûsk birîna xo ver nêşêno têbigêro. Brûsk seba ke embazanê xo nêerzo mîyanê rîskî, cîhazê bêtêlî ra qiseykerdişê xo yo peyên keno. Brûsko bi serran mîyanê şer û têkoşînî de mendo, qiseykerdişê xo yo peyên de xo deyndarê hemra û partîya xo vîneno.

Hilma xo ya peyêne de xo deyndar vîneno

Brûsk na çarçewa de qiseykerdişê xo de hemra û partîya xo rê xo rexne keno û çira hîna zaf sernêkewto ser o vindeno. Brûsk muhakemeyê na çalakîye keno û kêmanîyanê îfade keno. Tewr peynî dîyar keno ke o heme embazan ra zaf hes keno û dibare xo rexne keno. Brûsk dima ra bombaya xo xo de teqneno û resena şehadetî. Brûsko ke hilma xo ya peyêne de xo deyndar vîneno, raştîya xo fedakerdişî ya PKKyî yewna rey nîşanê herkesî dano.

Yazarın diğer yazıları

    None Found