Hepsîyo ke derbe werde, nêşêno qisey bikero

Zîdanê Xarpêtî ke hertim bi zext, teda û neheqîyan rojeve de yo, reyna bi hedîseyêk ame rojeve. Ame musayene ke gardîyanan bi mehneya ‘koguşê tenişta xo reyde qisey kerdî’ hepsîyan derbe kerd. Netîceyê derbkerdişî de hepsîyo bi nameyê Medenî Kîye nêşêno qisey bikero.

Derheqê hedîseyî de waya Kîyeyî Hatîye Kîye qisey kerde. Waye dîyar kerde ke wexto ke înan îşkence eşnawit, hewl da xo biresnî hepsîyan û înan muracatê Komeleya Heqê Merdiman kerdo. Kîye va ‘wexto ke avûkatî birayê mi reyde pêvînayîş kerd, dîyo ke birayê mi nêşêno qisey bikero’ û wina dewam kerde: “No senî wehşet o ke şima wina kenî. Ganî birayê mi roja panşeme bigêrayêne, labelê nêgêra. Wexto ke ma zîndan gêrayî, înan va problem çin o, labelê reyna zî nêgêra. Dima ra merdimê hepsîyêkê ma gêra û goreyê vatişê ci seba ke Medenî nêşêno qisey bikero, nêgêrayo.”

Waye Kîye va ‘ma cuya birayê xo ra etirîyenî’ û wina domnaye: “Ma nêzanî ke îşkenceyêko senî ameyo kerdene. No îşkence bi talîmatê mudirî ameyo kerdene. Ganî dewlete hende zî eciz nêbo. Ma nêşênî muxatab bivînî. Ê îdîa kenî ke dewleta huqûqî yî, labelê selahîyetdarî vengê xo nêkenî. No sucê merdimîye yo û ma do fek doza xo ra veranêdî.”

Hepsîyo ke her di çimê xo kor bîyî, nîno tehlîyekerdene

Heto bîn ra hepsîyo bi nameyê Yusûf Boro 52 serrî ke Zîndanê Tîpa Fyî yê Wanî de maneno û nêweşîya tansîyono berz ver her di çimê xo vînî kerdî, nîno tehlîyekerdene. Cinîya Borî Behîye Bore dîyar kerde ke rewşa mêrdeyê ci her ke şono xirabêr beno û nîno tedawîkerdene. Bore daye zanayene ke mêrdeyê ci 3 serrî vere tewqîf bîyo û wina dewam kerd: “Şertê zîndanî zaf xirabin î û bi hawayo baş nîno tedawîkerdene. Nêweşîye ver her di çimê xo vînî kerdî. Embazê mêrdeyê mi hetkarîya ci kenî. Seba ke tedawîya ci nîno kerdene, wina bi. Nika zî tehlîye nêkenî. Wa tehlîye bikerî ke ma tedawîya ci bikerî. Ez wazena ke wa heme hepsîyê nêweşî tehlîye bibî.”

AMED

Yazarın diğer yazıları

    None Found