Her ca de bi Kurdî

Platformê Ziwanê Kurdî ke 9 partîyanê sîyasîyan ra pê yeno, komxebatêk viraşte û derheqê ziwanî de qerarê muhîmî girewtî. Cinîyan komxebate ser o dîyar kerd ke ganî kurdî ziqaqan de, keye de, cayê karî û dezgehan de Kurdî qisey bikerî, binusî û biwanî.

Çend rojî verê temsîlkarê Partîyê HDP, DBP, OSP, PDK, PDK-T, PSK, PAK, Partîya Merdim û Azadîye, Tevgerê Azadîye seba ke ziwanê Kurdî aver bîşêrî û ziwan bibo ziwanê fermî Platformê Ziwanê Kurdî awan kerdî.

Platformî peynîya hewteyî de Komxebata Ziwanî viraşte û komxebate 2 rojan dewam kerde. Cinîyê ke beşdarê komxebate bîyî, derheqê komxebate û xebatê ke bêrî kerdene ser o qisey kerdî. Cinîyan ra Fahrîye Adsaya ke Weqfê Îsmaîl Beşîkçîyî de xebetîyena û açarnayîşan kena, dîyar kerde ke ziwan çîyo tewr muhîm ke nasnameyê merdimî temsîl keno yo.

Adsaye va ‘Amed de zaf tay merdimî Kurdî qisey kenî’ û wina dewam kerde: “Merdimî her ke şono hîna zaf benî marjînal. Ziqaqan de, otobusan de û cayê karî de zaf tay merdimî Kurdî qisey kenî. Zerrîya Kurdîstanî de Kurdî nîno qisey kerdene. Cok ra goreyê na komxebate xebatêka ereymende ya. Mabênê ziwan û sîyasetî de têkilîyêka muhîme esta. Eke dewlete rê bimano, dewlete wazena ma hemînan çin bikera. Cok ra ganî ma dewlete ra nê çîyan nêpawî. Labelê partîyî zî na babete de hertim pawitî û minet kerdî. Helbuk ziwan çîyêko ke merdim destûr bigîro û bikar bîyaro nîyo. Ganî ewil ma bi xo meşrûîyetê ci qebul bikerî ke wa kesê bînî zî rêz bigîrî.”

‘Wa herkes bi ziwanê xo biwano û binuso’

Hemsereka MED-DERî Mîne Karakaşe zî daye zanayene ke ê do sey MED-DERî destek bidî xebatanê ziwanî û wina va: “Heme xebatê ma ziwanî ser o yî. Verê cû Kurdî-Der estbi, labelê badê ke ame padayene, ma berpirsîyarî girewte milê xo. Heta ke ma dest ra yeno, ma hewl danî bihêz bikerî. Ma hertim ‘gelo ma senî eşkenî ‘ziwanê xo aver bîşêrî, bikerî ziwanê perwerdeyî û sewbîna’ ser o munaqeşeyan kenî. Waştişê ma o yo ke wa ziwanê ma bibo ziwanê fermî û bibo wayîrê statuyî. Kurdan ra zî waştişê ma o yo ke wa bi ziwanê xo qisey bikerî, biwanî û binusî.”

Seba ma çîyo esasî statu yo

Aktîvîsta Tevgerê Cinîyanê Azadan (TJA) û Ziwannas Mulkîye Bîrtane zî va ‘ziwan ziwanê herkesî yo, ameyîşê têhet yê 9 partîyan çîyo ke merdim şaş bibo, nîyo’ û wina domnaye: “No xaftila nêvejîya orte. Verê cû zî ziwanî ser o munaqeşeyî ameyî kerdene. Labelê gamêk nêame eştene. Dewletî ziwanê xo kenî fermî û mecbûrî. Naskerdeyê Çînî Konfuçyus ra persê ‘xebata sifteyîne ke ti bikerî çî ya?’ kerdî. Konfuçyusî zî cewabê ‘ziwan o’ dayo. Wexto ke sebebê ci ey ra ameyo perskerdene, Konfuçyusî vato ‘çimkî şima ancax bi ziwanê xo eşkenî fikiranê xo vajî, bixebitî û adalet temîn bikerî’. Kurdî zî nika aye nuqta de yî.”

Wa bibo ziwanê fermî û wayîrê statuyî

Bîrtaneye dewamê qiseykerdişê xo de wina va: “Heta nika dewlete û şaran estena kurdan înkar kerdî. Nika zî vanî ‘Kurdî estî, labelê ziwanê înan çin o’. Eke şima kurdî qebul kenî, ganî şima ziwanê ci zî qebul bikerî. Dinya de nimuneyê çareserbîyayîşê problemê ziwanî estî. Eke estena ma yena qebulkerdene, ganî ziwanê ma zî bêro qebulkerdene. Ma bawer kenî ke ameyîşê têhet yê partîyanê sîyasîyan do seba yewîya neteweyî zî bibo gamêk. Seba ma çîyo esasî wa ziwanê ma bibo ziwano fermî û statuyêk qezenç bikero.”

AMED

Yazarın diğer yazıları

    None Found