Hêriş vera hişê Kurdan de ameyo kerdene

19ê Kanûna 2017î de 267 cenazeyî Goristanê Garzanî ra amebî remnayenen û heta nika aqûbetê nê cenazeyan nîno zanayene. Seba ke cenazeyî bêrî girewtene, 2 serrî yo ke keye û avûkatî muracatan kenî, labelê heme bênetîce mendî .

Babete ser o Hetkarê Hemserekîya HDPyî Azad Barişî qisey kerd û dîyar kerd ke hêrişê ke cenazeyan rê ameyo kerdene raştîya xo de vera hişê Kurdan de ameyo kerdene. Barişî va ‘Vera cenaze û definkerdişê merdeyî de rêzgirewtiş qasê tarîxê merdimîye kehen o’ û wina domna: “Eke merdeyî rê rêz nêro girewtene, o komel medenî nîyo. Yanî o komel beno barbar. Tîya de huqûqê dişmenîye zî çin o. Çimkî merde seba dişmenî zî pîroz o. Herkes wazeno ke vîrardişê merdeyê xo bicuyo.”

Barişî dewamê qiseykerdişê xo de va ‘dewlete wina kerdo ke wa Kurd merdeyê xo zî xo vîra bikero’ û wina dewam kerd: “Çîyê ke yenî kerdene, bi temamî vera hişê Kurdan de yenî kerdene. 40 serrî yo ke no welat de şerêk esto û hertim merdimî mirenî. Wexto ke kesêk merd, şima nêşênî tira vajî terorîst. Ganî şima ê merdeyî rê rêz bigîrî.  Çîyê ke vera cenaze û goristanan ameyî kerdene taktîkê şerê taybetî yî. Tarîx de wexto ke yew merd, seba ke bêro definkerdene mabên dîyayêne şerî. Wexto ke ameyî definkerdene, dima ra şer dewam kerdêne. Dewlete hewl dano nêyî bido vîrîkerdene. Labelê ti vîrardiş nîno vîrîkerdene. Mezelê ma pîroz î, ma do wayîrê înan bivejyî.”

Wa aştîwazî bêrî têhet

Barişî va ‘ganî dayîkê ke cenazeyê înan ameyî remnayene û dayîkê ke domanê înan koyan de yî bêrî têhet. Eke dewlete samîmî ya, wa rayîr akero. Şima 40 serrî yo ke bi gaz û awa tazyîqine danî dayîkan ro, labelê çend keyeyan zî anî vernîya HDPyî. O ke xo ra vajo ez merdim a, qet hewara dayîna bikar nêano. Nê domanî bi şer nînî, bi aştîye yenî. Cayo ke ma domanan bigêrî awanîya HDP nê, berê dewlete yo.”

MA / STENBOL

Yazarın diğer yazıları

    None Found