Hêrsê şarî do heme komployan veng bivejo

Hemserekîya Konseyê Caardişî yê KCKyî bi wesîleya serrgêra 21. ya destpêkê Komploya Mîyanneteweyî de dîyar kerde ke hêrsê Kurdan do zorê heme komployan bîşêro û da zanayene ke vera komplo de xoverdayîşêko gird yeno dayene û no xoverdayîş do tecrîdê Îmrali zî wedarno.

9ê Teşrîna Verêna 1998î de Rayberê Şarê Kurdî Abdullah Ocalan bi zextanê dewletanê mîyanneteweyîyan Sûrîye ra amebi vetene û peynîya prosesêkê 5 aşman de 15ê Sibata 1999î de amebi tepiştene. Coka na roje sey destpêkê Komploya Mîyanneteweyî yena zanayene.

Hemserekîya Konseyê Caardişî yê KCKyî bi wesîleya serrgêra 21. ya destpêkê Komploya Mîyanneteweyî de îzehetêk da û dîyar kerde ke Rayber Apoyî komplo pûç vet û hêrsê şarê ma yê vera komplo de do zorê heme komployanê vera Tevgerê Azadîya Kurdan de bîşêro.

Hemserekîye dewamê îzehetê xo de vato ‘seba ke Rayber Apoyî şaranê Rojhelatê Mîyanênî sîtemêko demokratîk afernayêne, bi Komploya Mîyanneteweyî hedef ame girewtene’ û îzehet wina dewam kerdo: “Seba ke bi komplo nêeşkeayî vernîya ey bigêrî ewro Îmrali de tecrîdo giran yeno caardene. Labelê rixmê na komplo vernîya têkoşînê Kurdan û şaranê Rojhelatê Mîyanênî nêame girewtene.”

Nika wazenê komployêka bîne bierzê dewre

Hemserekîye îzehetê xo de bale anta kûrbîyayîşê komplo ser û wina vato: “Na komploya zaf aktorin a ke tarîx de nimuneyê aye çin o, ramojnena ke komplokarî senî hêzê şorişgêrî yê bedilnayîşî yê Rayber Apo û Tevgerê Azadîye ra tersenê. Seba ke na komploya înan pûç ameye vetene, nika vera PKK û Tevgerê Azadîya Kurdan de wazenê ke kopmloyêka bîne bierzê dewre.”

No xoverdayîş do heme komployan veng bivejo

Hemserekîye îzehetê xo de qala xoverdayîşo ke vera komplo de yeno dayene kerda û wina vato: “Îqtîdarê AKPyî ke ameyo nuqtaya rijnayîşî, bi hêrişê vera Kurdan de wazeno payra bimano. Îqtîdaro faşîst bi heme îmkananê xo seba tasfîyekerdişê Tevgerê Azadîye hêriş keno. La vera nê hêrişan de bi ruhê şehîdanê xoverdayîşê ‘Şima nêeşkenê Roja ma tarî bikerê’ her ca de bi fedaîkî yeno xoverdayene. No xoverdayîşo tarîxî yo ke bi bedelanê girdan heta ewro ame, do komployanê ewroyênan zî veng vejo. No xoverdayîşo gird do tecrîdê Îmrali zî wedarno û Kurdan biresno azadîye û Rojhelato Mîyanên rê demokrasî bîyaro.”

ANF / BEHDÎNAN 

Yazarın diğer yazıları

    None Found