Hewcedarî bi prosesê neweyî esta

Berpirsîyarê Komîteya Dîplomasî ya TEV-DEMî Aldar Xelîlî derheqê prosesê çareserkerdişê problemanê Sûrîye kerd û wina va: “Nika eke Cenevre newe ra ganî bo û ma zî tede ca bîgêrê, têsîrê ci beno. Ma semedê çareserîya sîyasî ya Sûrîye dîyalogî rê amade yê.”

MAXÎME AZADÎ/ALÎ GULER / ANF/BRUKSEL

Berpirsîyarê Komîteya Dîplomasî ya Tevgerê Komelê Demokratîkî (TEV-DEM) Aldar Xelîlî derheqê dagîrkerîya dewleta tirkî ya Efrînî de, tehdîdê DAÎŞî, hewldayîşê çareserîye, fikra herêma tampone, projeyê federasyonî yê Vakur û Rojhelatê Sûrîye û sewbîna xeylê çîyan ser o qisey kerd û bitaybetî qala prosesê çareserîya problemanê Sûrîye kerd.

Xelîlî bale ante xoverdayîşê vera dagîrkerîya Efrînî de yeno dayene ser û wina va: “Dewleta Tirkî bi heme hêzê xo erdê Efrînî fîna dest, la çirey nêeşkaye îradeyê şar û xoverdayoxanê Efrînî bişikno.”

Xelîlî da zanayene ke ê bawer kenê ke Efrîn do bêro xelisnayene û wina va: “Heme waştiş û planê ma naye ser o yê. Dewleta Tirkî senî ke bi serran o Vakurê Kurdistanî de semedê çinkerdişê  kultur, ziwan û tarîxê Kurdan tê gêrena, nika zî heman polîtîka Efrîn de bica ana. Şarê Efrînî cayê ci ra vejenê herinda ci de keyeyanê çetayan bica kenê. La ê se kenê wa bikerê xoverdayîşê ma yê semedê azadkerdişê Efrînî dewam keno. Efîn do reyna ê Efrînijan bo.”

Ganî ewro ra tepîya zî têkoşîn bibo

Xelîlî dewamê qiseykerdişê xo de wina va: “DAÎŞ hema temamî nêqedîyayo. Hetê zîhnîyetî ra sey tehtîdêk hema esto. Grûbê ci yê nimiteyî estî. No tena semedê Rojawan û Vakurê Sûrîye nê, semedê heme merdimîye tehtîdêk o. Têkoşîno hemparo ke heta nika vera DAÎŞî de dîya ganî, ewro ra tepîya zî vera înanê ke çeteyan weye kenê û paştî danê înan de zî bêro dayene. Ancax wina peynîya DAÎŞî yena. Çeteyê ke tepişte yî zî ganî hetê welatanê ci ra bêrê girewtene û bi Neteweyê Yewbîyayeyî û hêzanê mîyanneteweyî semedê muhakemekerdişê înan mehkeme bêro ronayene.”

Ma seba dîyalogan amade yê

Aldar Xelîlî va ‘demê Cenevre felç bi’ û wina dewam kerd: “Sere de Sûrîye û teber de têsîrê muxalefetî estbi. La nika wina nîyo. Heme hêzan vîndî kerd. Sûrîye de qet têsîrê înan nêmend. Dewleta Tirkî zî ê rotî. Guta, Hûmûs, Hama, Heleb û tewr peynî de Idlib de destê xo înan ra ancena. Bîyî bêhêz. Cenevre wina felç bi. Astana zî mabênê Rûsya, Tirkîya û Îranî de bî. Bi operasyonê Idlibî a zî bîye bêtesîr. Hinî demê Astana nêmend. Rûsya herçiqas pêvînayîşan virazo zî têsîrê ci nêmend, raştî de qedîyaye. Ma roja ewile ra vanê pêvînayîşî wa bin serbanê Neteweyê Yewbîyayeyî de bêrê viraştene. Nika eke Cenevre newe ra ganî bo û ma zî tede ca bîgêrê, têsîrê ci beno. Ma semedê çareserîya sîyasî ya Sûrîye dîyalogî rê amade yê.”

Semedê îtîfaqî hema zeman hewce keno

Xelîlî qiseykerdişê xo de qala herêma tampone kerde û wina qedêna: “Nika îdareyê Vakur û Rojhelatê Sûrîye dir na babete ser o pêvînayîşî yenê viraştene. Çend kombîyayîşî ameyî viraştene. La hema nêtîceyêk nêameyo girewtene. Sey rojeve werte de mend. Amerîka wazena ke sere de welatanê Ewropa û hêzanê koalîsyonî hempar bikero. Wazenê ke tayî çîyan bi Tirkîya bidê qebulkerdene. Xora şertê ma zî estê. Hema îtîfaq zelal nêbîyo. Semedê îtîfaqî hema zeman hewce keno.”

Yazarın diğer yazıları

    None Found