Înan bi cezadayîşî heyfê ci mi ra girewt

Parlamenterê HDPyî yo kehen Ferhat Encu 3 serran ra pey tehlîye bi û tewqîfbîyayîşê xo ser o va ‘seba ke ma bêhuqûqîyê îqtîdarî ardêne ziwan, înan heyfê xo mi ra girewt’ û wina domna: “Çimkî Qetlîyamê Roboskê zaf AKPyî da zorî. Seba ke mi zî zaf Qetlîyamê Roboskê ard rojeve, înan heyfê ci mi ra girewt.”

BERÎVAN ALTAN / DENÎZ NAZLIM / MA / STENBOL

Parlamenterê HDPyî yo kehen Ferhat Encu 3 serrî zîndan de mend û 14ê Hezîrane de tehlîye bi. Encuyî tewqîfbîyayîşê xo ser o qisey kerd û dîyar kerd ke seba ke o Qetlîyamê Roboskê zaf ardo rojeve, ameyo tewqîfkerdene.

Encu pêro pîya 4 serrî 7 aşmî 10 rojî ceza girewtbi û badê ke cezaya ci qedîyaye, tehlîye bi. Encuyî va ‘ma 4ê Teşrîna peyêne de rewa rew ameyî tepiştene û tewqîf bîyî’ û wina domna: “Ma verê cu zî vatbi, nika zî vanî prosesê tewqîfbîyayîşê ma bi temamî qerarêko sîyasî bi. Xora prosesê ci ra ver, hîna zaf zehmetin bi. Ca û warê xeylê merdiman bi tanqan ame xirakerdene û xeylê sîvîlî ameyî kiştene. O wext çîyêk ma dest ra ame ma kerd, labelê weşê îqtîdarî nêşi û ma asteng kerd.”

Encuyî va ‘ez sey vengê şarê Roboskê şîya Meclîs’ û wina dewam kerd: “Bitaybetî cezadîyayîşê mi reyde mesajêk dîya şarê Roboskê. Raştîya xo de mesajêk dîya Kurdan hemînan. Qetlîyamê Roboskê ver îqtîdarê AKPyî zaf kewt zehmetîyan mîyan. Coka zaf hêrsê înan vera roboskêyijan de estbî. Na hêrsê înan zî şexsê mi de vejîya werte.”

Rojê ma zaf baş derbaz bîyênê

Encuyî va ‘tewqîfbîyayîşî ra dima ez 70 rojan tecrîd de menda’ û wina da domnayene: “Dima ra ez şîya mîyanê embazanê sîyasîyan. Zîndan de vera rehabîlîtekerdişî de cuyêka cîyaye yena cuyayene. Ewja de merdimî cuya şorişgêre rêxistine kenî. Cayêko zaf weş bi û hertim moral û motîvasyon estbi. Ewja de rojê ma zaf baş derbaz bîyênê. Ma hewl dayêne pey caman ra vengê xo biresnî embazanê cinîyan. Cok ra hertim rojê ma bi moral û motîvasyonî mîyan de derbaz bîyêne.”

Hepsîyê nêweşî nêameyêne sewqkerdene

Encuyî dîyar kerd ke o şahidîya xeylê bêhuqûqîyan kerdo û wina va: “Bitaybetî zîndan de metodê îşkenceyê psîkolojîkî ameyêne bikarardêne. Xeylê heqê hepsîyan ameyêne xespkerdene. Tewr zaf zaf hepsîyê nêweşî ma ser o tesîr kerdêne. Sewqê înan nêameyêne viraştene û o zî zaf ma dayêne zorî. Reyna wexto ke sewq biameyêne viraştene zî bi rînganê yew kesan berdêne nêweşxane. Dest ronîyayêne kitab, radyo û rojnameyanê ma ser. Çalakîyêka şenike daxî bîyêne sebebê veşnayîşê înfazê embazan. Ez xeylê reyan raştê nizdîbîyayîşanê provokatîfan zî, labelê mi destûr nêda ke aver şêro.”

No wezîfeyê herkesî yo

Xora wexto ke seba wedarnayîşê tecrîdî çalakîyî dest pêkerdî, her kes waştêne ke mîyanê xoverdayîşî de bibo. No zî merdim de hîsdarî virazeno. Hende dejî ameyî cuyayene, labelê reyna zî Birêz Ocalanî mesajê xo de qala Vilaweka 2013î kerd û no zaf muhîm bi. Tena Kurdî nê, ganî herkes bifikirîyo û hetê edalet, aştî, demokrasî û huqûq de ca bigîro. No wezîfeyê herkesî yo.”

Yazarın diğer yazıları

    None Found