Kobanê de bi hezaran kesî rayîr ra şîyî

Tehdîdê hêriş û dagîrkerîye yê dewleta Tirkî vera Vakur û Rojhelatê Sûrîye de dewam kenî. Çend rojî verê Serekkomarê Erdoganî bi hawayo aşkere Rojawanê Kurdîstanî tehdît kerd û amancê xo yê dagîrkerîye dîyar kerd. Vera tehdîdê hêriş û dagîrkerîye de hêrs û reaksîyonê Kurdan zî dewam kenî.

Na çarçewa de Vakur û Rojhelatê Sûrîye de, Ewropa de û xeylê cayanê bînan de Kurdî û dostê Kurdan payan ser o yî. Na çarçewa de bi hezaran kesî Kobanê de vejîyayî raşteyan û çalakgêran tehdîdê dagîrkerîye şermizar kerd.

Bi hezaran çalakgêrê ke Rasteyê Cinîya Azade de ameyî têhet, ver bi Raşteyê Aştîye rayîr ra şîyî. Fotografê şehîdan ameyî berzkerdene û pankartê ke ser o ‘Şarê Vakur û Rojhelatê Sûrîye do dagîrkerîye qebul nêkerî’ û ‘Seba Rojawanî sere wedarne’ ameyî akerdene û siloganî ameyî eştene.

Wa herkes bivejîyo raşteyan

Rayîrraşîyayîşî ra dima seba şehîdan rêz ame girewtene. Dima ra Hemserekê Meclîsê Kantonê Kobanê Mûstefa Êtoyî va ‘dewleta Tirkî wazena çîyê ke Efrîn de ameyî cuyayene, dibare bikera’ û wina dewam kerd: “Labelê şarê Vakur û Rojhelatê Sûrîye do destûr nêdî dagîrkerîye. Tena rayîrêk esto o zî xoverdayîş o.” Hemserekê Meclîsê Caardişê Îdareyê Xoserî yê Herêma Firatî Lemîs El-Ebdullah zî veng da herkesî ke wa vera dagîrkerîye de herkes bivejîyo raşteyan.

ANHA / KOBANÊ

Yazarın diğer yazıları

    None Found