Kultur dewlemendîya merdimîye yo

Êlih û dormeyê ci de ananeyÊ xele ra viraştişê savarî çinbîyayîşî reyde têrî yo. Seke yeno zanayene aşê destan ke Êlih de zaf î, êdî nînî bikarardene. Tayê kesî seba ke no anane vinî nêbo, hewl danî bidî cuyayene. Nînan ra yewe zî Razîye Yilmaze ya.

Razîye Yilmaze Jinnews ra Rengîn Azîzoglu rê muhîmîya kulturî ser o qisey kerde û dîyar kerde ke kultur dewlemendîya merdimîye yo û ma zî bi pawitişê kulturê xo heqîqata xo bipawî. Yilmaze daye zanayene ke aye bi domanîya xo ra nata savar virazena û wina dewam kerde: “Êdî savaro hazir esto û ti kes pê mijul nêbeno.”

Yilmaze va ‘verê cû wexto ke hamnanan karê ma qedîyayêne, ma dest bi viraştişê savarî kerdêne’ û wina domnaye: “Ma dima ra seba ke ziwa bibo banan ser o rakerdene. Verê cû vernîya banan de aşê kerrayinî estbî. 6-7 kesan savarî kutêne û wextê kutişî de deyîran vatênê. Heme dewijî dormeyê înan de kom bîyêne.”

Yilmaze dewamê qiseykerdişê xo de va ‘viraştişê savarî heta 20 rojan dewam kerdêne’ û wina dewam kerde: “Wexto ke savar amade bi, bi hawayo seyyewbînan vilayê dewijan ameyêne kerdene. O wext xo qurrekerdene, pîl vînayene û sewbîna çinêbi. Merdimî wijdanin bî. Verê cû feqîrî ameyêne waştêne. Ewro tehmê savarî zî bedilîyayo. Teknolojîyî karê merdiman kerd rehet labelê merdiman zî yewbîna ra cîya kerd, dûrî fîna. Ez hêvî kena ke anane û kulturê ma vinî nêbî. Kultur dewlemendîya merdimîye yo. Eke ma raştîyanê xo ra durî bikewî, ma merdimîya xo ra zî durî kewenî. Ganî ma kulturê xo bipawî.” n ÊLIH

Yazarın diğer yazıları

    None Found