Kurd bûn îlhama Plymouthê

Li bajarê Ingilîstanê Plymouthê civaka Kurd bi xwarin û muzîka xwe ji civaka bajêr re bûye îlham. Di vî karî de jî navenda wan a civakî KEC û koma wan a muzîkê ya ji Şiko, Nebez û Huseyîn pêk hatî bi rola diyarker radibin.

Li quncigeke Ingilîstanê, li bajarê ber perê behrê yê başûrê Ingilîstanê Plymouthê, civakeke piçûk a Kurdan heye, lê ew ji niha ve bûne îlham ji vî bajarî re. Bi gotinên Baz ê ku kordînatorê Kurdish Exile Centerê (Navenda Mişextiyê ya Kurdan-KEC) ye, kurt û kurmancî sedema vê îlhama hanê rave dike: “Muzîk û xwarin zimanên gerdûnî ne. Rêyên bedew in ji bo mirovan bînin cem hev û bendan biteqînin. Pêdiviya we pê nîne hûn bi zimanekî zanibin da ku hûn guh bidin muzîkî û pê kêfxweş bibin.”

Baz Ehmed sala 2000´î ji Başûrê kurdistanê bûye penaber û li Ingilîstanê bi cih bûye. Ew niha li bajarê Plymouth kordînatorê KEC´yê ye. Ji bilî karê muzîkê, çanda Kurdî û kar û barên civaka Kurd li Plymoputhê, ew alîkar dibe bi Kurdan re da ku ji nameyên fermî yên meqamên dewletê yan jî şaredariyê û şirketan hatine. Jixwe meseleya zimanê Ingilîzî li vir ne pirsgirêka esasî ye, ji ber ku jargona nameyên fermî û yên şirketan dikin ku gelek Ingilîz jî ji wan nameyan fêm nekin û li alîkariya hiqûqî yan jî ziman bipirsin.

Baz ji bo karê KEC´yê dibêje, “Em weke pireke civakî ne. Em muzîk û çanda xwarinê bi kar tînin da ku lihevkirina civakê zêlde bikin da ku em bi silametî û ahengê bi hev re bijîn.”

Muzîk zimanekî gerdûnî ye

Çawa dike KEC vî karî, ji bo vê jî ew dibêje, “Muzîk û xwarin zimanên gerdûnî ne. Rêyên bedew in ji bo mirovan bînin cem hev û bendan biteqînin. Pêdiviya we pê nîne hûn bi zimanekî zanibin da ku hûn guh bidin muzîkê û pê kêfxweş bibin. Eynî weke xwarinê, hûn dikarin bi tama wê kêfxweş bibin, bêyî ku hûn bi awayê çêkirina wê zanibin yan jî zanibin ka kê çêkiriye.”

Ji bo vê jî KEC çalakiyîn civakî û çandî hem li mekanê xwe û hem jî li derve dike.

Ji bo Baz ne hêsan bû, gava ew nû hat Plymouthê, 7 Kurd lê hebûn. Niha ne wisa ye, li Plymouth û derdora wê yanî li Devon û Cornwallê qederê 3 hezar Kurdan hene îro.

Şiko stranbêj e

Ji endamên civata Kurd yek jê jî li Plymouthê Şiko ye. Ev sê sal in ku ew ji Başûrê Kurdistanê hatiye. Ji ber çi, bersiva wî wisa ye: “Esas, evînê ez anîm Plymouthê. Ez bi welatiyeke Brîtanî re zewicîm û ew jî weke min Kurd e. Mirov li vir bi rastî baş in. Beriya ez bêm vir, ez li tiştekî din difikirîm, lê xelk qenc e, û bi rastî jî bi xêr û xweşiyê mirovan dihewînin.”

Ew li vir di koma muzîkê de hem stranbêj e, û hem jî li gîtarê dixe. Bêriya çi dike li Kurdistanê: “Xwarin û malbata min.” Piştre jî bi henekî lê zêde dike, “Lê bi giştî xwarin. Menuyeke xweş a xwarinên Kurdî li vir jî heye, lê ne ya ku ez dixwazim e. Xwarinên vir wê ti carî weke xwarina diya min xweş nebe.”

Nebez ûdvan e

Nebez hîna vê Sibatê ji Kurdistanê hatiye bajêr. Ew dibêje, ji ber sedemên civakî hatiye û naxwaze bêhtir bide nav. Ew ûdvan e: “Ûd bêhtirî 5 hezar salan kevin e xebero. Navê wê jî bi maneya darê gelekî nazik e.”

Ew li Parka Freedom Fieldê ya li bajarê Plymouthê bi hev re strana Kiras Zerde dibêjin. Straneke gelêrî ye li ser jineke bi kirasekî zer. Nebez dibêje, “Gava ez dibînim kêfa xelkê jê re tê, û bi muzîkê re ew jî tevdigerin, ez jî gelekî şa dibim. “Music is really the backbone of our social events.”

Huyezin ev 5 sal in ku li Plymouthê ye. Ew jî di komê de ye, lê li ti amûrên muzîkê naxe, ew tenê stranan dibêje, “Ez hez ji stran gotinê dikim. Ez ne profesyonel im, yan jî tiştekî wisa. Lê ez hez ji stran gotinê dikim, ez tenê hez ji stranan dikim.”

NAVENDANÛÇEYAN

Yazarın diğer yazıları

    None Found