‘Ma dewlete ra çîyêk nêpawenî’

3 rojî yo ke qezaya Licê ya Amedî de operasyonêko leşkerî dîyayo destpêkerdene û zulmê dewijan yeno kerdene. Leşkeran helikopter ra dewijan ser o gule varnayo û netîce de kesêk birîndar bîyo. Reyna leşkeran hêgayê dewijan veşnayo û 4 kesî tepiştî. Dewijan ra K.Myî dîyar kerd ke ma dewleta ke nînan kerdo ra çîyêk nêpawenî.

Leşkeranê dewleta Tirkî Qezaya Licê ya Amedî ra girêdaye taxa Banaderanî 3 rojî verê girewtbî binê abluqa û operasyon dabi destpêkerdene û operasyon dewam keno. Çarçewaya operasyonî de dewijan ser o gule amebî varnayene û hêgayê dewijan ameyî veşnayene. Dewijan dîyar kerd ke leşkeran hêrişê înan kerdo.

Goreyê çimeyanê herêmî helîkopteran ra guleyî dewijan ser o ameyî varnayene. Netîceyê ci de bi nameyê Mehmet Hasan Vûralî de kesêk birîndar bi û dima ra ame tepiştene. Ame musayene ke Vûral bi saetan bi hawayo birîndar ameyo vindarnayene.

Pîyê ci Ramazan Vûralî zî vera naye de reaksîyon nîşan dayo û o zî hetê leşkeran ra ameyo derbkerdene. Reyna hêgayê Vûralan zî hetê leşkeran ra ameyo veşnayene. Babete ser o K.Myo ke ewleyîye ver nameyê xo eşkera nêkerd, dîyar kerd ke çend rojî yo ke topî erzîyenî herême û wina va: “Pêrodayîşî vejîyayênê. Roja sêşeme leşkeran rayîrê dewe tepişti. Ma her serre eynî çîyan cuyenî. Hela şanî ra zî dest bi eştişê dewan kerdî. Helîkopteran ra guleyî varnayî û o wext Mehmet Hasan û pîyê xo hêgayî mîyan de bî. Mehmet Hasan birîndar bi.”

Leşkerî her serre wina kenî

K.Myî dewamê qiseykerdişê xo de va ‘wexto ke ma ver bi hêgayan şîyî, leşkeran zî vera xo da hêgayan’ û wina domna: “Leşkeran Mehmet Hasanî girewt û vatî ke ê do bîşêrî nêweşxane. Pîyê ci Ramazanî waşt ke wa ambulanse bêro, labelê leşkeran ey derb kerdî û hêgayê ci veşna. Herçiqas ke ma hewl da ke ma şewat bimirênî zî destûr nêdîya. 4 kesê ke hetê ma de bî, tepişti. Dima ra ma musayî ke çend saetî ra dima înan Mehmet Hasan berdo nêweşxane. Leşkerî her serre wina kenî. Ma hukmato ke çîyanê winasîyan keno ra çîyêk hêvî nêkenî. Her hetê ma de qereqol û qeleqolî estî. Ma cuyêka winasî nêwazenî. Wa şar vera nînan de bêveng nêmano. Wa qoricîyê ke hukmat rê xebetîyenî, şerm bikerî.”

Herême de abluqa dewam kena

Operasyonê leşkerî taxa Tûtê de dewam keno û ame musayene ke hêgayê taxe hetê leşkeran ra ameyî veşnayene. Dewijan ra Mehmet Kapan û lajê ci Mehmet Alî Kapan ameyî tepiştene. Goreyê çimeyanê herêmîyan tayê leşkerî peyser ameyî antene û abluqa dewam kena. Fotografê ke herême ra yenî de aseno ke hêga û daristanî bîyî wele.

HDPyî heyet erşawit Licê

Partîya Demokratîke ya Şaran (HDP) seba ke Licê de taxê ke operasyon dîyayo destpêkerdene, dewijan ser o guleyî ameyî raşanayene û hêgayî veşnîyayî de cigêrayîşan bikero, heyetêk erşawit herême. Heyet mîyan de Parlamentera HDPyî ya Amedî Remzîye Tosûne û Hemserekê HDPyî yê Bajarî Zeyyat Ceylane zî heyet de ca gênî. Heyetî herême de cigêrayîşî kerdî.

AMED

Yazarın diğer yazıları

    None Found