Ma do cinîyan tarîtîye ra bixelisnî 

Cinîyê ke mîyanê YPJyî de beşdarê Hemleya Firtineyê Cizîrî benî, dîyar kerdî ke armancê înan zulm ra rizgarkerdişê heme cinîyanê dinya yo û wina vatî: “Ma do heme cinîyanê dinya zulmê çeteyanê DAIŞî ra bixelisnî û heyfê heme cinîyan bigîrî.”

DÎYAR EHMO / EMAR EL-XELEF / ANHA / DÊRAZOR

Çend rojî verê Hêzê Sûrîyeya Demokratîke (HSD) ke xeylê hêzî mîyanê ci de ca gênî, bi îzehetêkî dîyar kerdbî ke ê Hemleya Firtineyê Cizîrî de dest bi merhaleyo peyên kenî. Na çarçewa de şerwanê HSDyî dormeyê dewa El-Sûse de 2 kîlometre aver şîyî.

Şerwanê cinîyî ke Yewîyê Pawitişê Cinîyan (YPJ) mîyan de tugayê sîlehanê giranan de ca gênî, Hemleya Firtineyê Cizîrî de meterîsanê tewr vernîyan de şer kenî. Cinîyî dîyar kenî ke ê seba ke heyfê cinîyanê şengalijan û heme cinîyanê dinya zulmê çeteyanê DAIŞî ra rizgar bikerî, na hemle de ca gênî.

Fermandara yewîyê tugayê hewanvanan Jinda Welate daye zanayene ke rolê cinîyan Hemleya Firtineyê Cizîrî ke nika rojhelatê Dêrazorî yeno rizgar kerdene de dîyarker o. Jînda Welate dewamê qiseykerdişê xo de wina va: “Yewîyê ma merhaleyê peyên yê Hemleya Firtineyê Cizîrî de seba heme cinîyan şer kenî. Ma seba ke cinîyan tarîtîya terorîstan ra bixelisnî ameyî.”

Ma seba heyfê cinîyanê Şengalî ameyî tîya

Jînda Welate qiseykerdişê xo de qala zulmê çeteyanê DAIŞî ke cinîyan ser o estî, kerde û wina va: “Ma sere de seba ke heyfê cinîyê şengalijî ke hetê çeteyanê DAIŞî ra sey kole yenî rotene, raştê îşkence û qetlîyaman yenî bigîrî, ma soz dayo şehîdan. Ma do bi na hemle sozê xo bîyarî ca. Seba rizgarkerdişê Dêrazorî û çinkerdişê DAIŞî sîlehê mi amade yo.”

Dêrazor ra dima hedefê ma Efrîn o

Jînda Welate bale ante dagîrkerîya dewleta tirkî ya Efrînî ser û wina va: “Ma do Efrîn tena nêverdî. Ma seba azadîya Efrînî amadekarîye kenî. Senî ke ma Vakurê Sûrîye azade kerd, ma do Efrîn zî azade bikerî. Şarê Efrînî vera sîlehanê tewr teknolojîkan de xover da û xoverdayîşê xo hîna zî domneno.”

Eylem Minbice zî bi doçkaya xo hemle de cayê xo gêna. Eylem Minbice va ‘ez seba ke heme cinîyanê dinya hakimîya sîstemê camêrdî ra bixelisna, beşdarê YPJyî bîya’ û wina dewam kerde: “Ez bi doçkaya xo ya 23yî ke zaf tira hes kena, vera DAIŞî de şer kena. Seba ke ez çeteyanê DAIŞî ke zulmê cinîyan kenî reyde şer kena, zerrîweş a.”

Yazarın diğer yazıları

    None Found