Ma do îradeya xo teslîm nêkerî

Hemserekê Şaredarîyanê Bajarê Girdan yê Amed, Wan û Mêrdînî wezîfe ra ameyî girewtene û herinda înan de reya 2. qayûmî ameyî tayînkerdene. Vera xespbîyayîşê îradeyan de welatîyî ziqaqan de yî û qerarî şermezar kenî.

Çalakîya ke vernîya Şaredarîya Bajarê Girdî ya Amedî de dewam kena rê polîsan bi bombeyê gazî û awa tazyîqine mudaxale kerd. Welatîyî dîyar kenî ke ê do ziqaqan nêteriknî û îradeya xo teslîm nêkerî. Meryem Soylu va ‘heta ke dalpeyêka gonîye bedenê ma de esta, ma do xover bidî’ û wina dewam kerde: “Dewlete wazena bi zorî dest ser îradeya şaran na. Labelê şar sere nêroneno. Wa baş bizanî ke ma do îradeya xo teslîmê înan nêkerî.”

Ayşan Kanûş Zengîne zî wina va: Ma do payan ser o bî û qayûman bierşawî. Seba ke polîtîkaya înan ya Sûrîye veng vejîya, qayûmî tayîn bîyî. Ma qayûm nêşinasnenî. Ma veng danî çar parçeyanê Kurdîstanî û dinya, êdî bes o.” Rasîm Ozunluyî zî bale ant vatişê Erdoganî yê ‘ê şaredarîyan bigîrî zî ma do tepîya înan ra bigîrî’ ser û wina va: “Wa herkes bibo yew. Ewro wazenî ke nîyetê şarî bimusî. Eke ewro şar bêveng bibo, o wext do heme şaredarîyan bigîrî. Coka ganî Kurdî heme cayan de biwerzî payan ser û na neheqîye qebul nêkerî.”

Abdulkadîr Kizilaî zî da zanayene ke şaredarîyî yê şarî yî ganî herkes wayîr bivejîyo. Medîne Olçene zî va ‘ma 3 rojî yo ke ziqaqan de yî’ û wina domnaye: “Ma cinîyî nêyî sey tacîz û tecawiz vînenî. No fotografê faşîzmî yo. Ma do heqê xo teslîm nêkerî.”

MA / AMED

Yazarın diğer yazıları

    None Found