Ma nêwazenî la eke bibo ma do xover bidî

NAZIM DAŞTAN / MA / QAMIŞLO

Badê ke Hêzanê Koalîsyonî ser sînorê Girê Spî û Serêkanîyê ra xo peyser antî, şarî vera dewleta Tirkî de çalakîyê xo zêdenayî. Tirkîya grûbanê çeteyan sewqê herême kena û ame musayene konvoyêkê 100 wesayîtan Serêkanîyê de ameyî bicakerdene.

Hêzê Sûrîyeya Demokratîek (QSD) zî lez dayo pawitişî û amadekarîyan keno. Hucreyê DAÎŞî reyna kewtî hereket û dest bi hêrişê Reqqa kerdî. Îdareyê Xoserî yê Herême seba xoverdayîşî veng da. Dormeyê Girê Spî û Serêkanîyê de çadirê nobetî ameyî awankerdene. Heto bîn de dinya ra xeylê hetan vera nê amadekarîyanê dewleta Tirkî de reaksîyon nîşan da.

Verfekê Meclîsê Leşkerî yê Girê Spî Mihemed Hecî Mehmûdî dîyar kerd ke eke vera erd û sînoranê înan de tehdîdêk bibo, ê do xo bipawî. Mehmûdî dewamê qiseykerdişê xo de va ‘ma 8 serrî yo ke şerêko giran mîyan de yî û ma hewl danî newe ra erdanê xo awan bikerî’ û wina domna: “Eke Tirkîya peymana sînorî çin bihesibno, ma do xover bidî. Ma amade yî ke şarê xo bipawî. Ma domanê nê erdan î. Ma senî ke verê cû hetê şarê xo de bî, ma do nika ra pey zî wina bikerî.”

Beno ke hucreyê nimiteyî bikewî dewre

Mehmûdî va ‘eke herême de şerêk dest pêbikero, o wext do endamê DAÎŞî ke zîndanan de yî rewşa înan bikewa merhaleyêko krîtîk’ û wina qedêna: “Beno ke hucreyê nimiteyî bikewî dewre. Eke kaos û krîzêk bivejîyo o wext nîno zanayene ke DAÎŞijî do se bibî. Beno ke nê reyna sereyê dinya rê bibî tehdîdêko gird.”

Yazarın diğer yazıları

    None Found