‘Ma seba xoverdayîşo hempar veng danî’

Endamê Komîteya Caardişî ya PKKyî Duran Kalkanî hêrişê ke vera Xakûrkê de benî ser o va ‘Nê hêrişî zaf birehend î’ û wina domna: “Tîya de amanc dagîrkerdişê Efrîn ra heta Xakûrkê, bi qirkerdiş û tehcîr mendekerdişê dagîrkerîye, girewtişê weçînayîşanê Stenbolî û kurdan mîyan de pêrodayîş bivejo yo.”

Endamê Komîteya Caardişî ya PKKyî Duran Kalkanî derheqê babetê ke rojeve de yî ser o qisey kerd û mesajê muhîmî dayî. Kalkanî bitaybetî hêrişê ke vera Xakûrkê de benî ser o vindet û bale ante amancê zaf hetinî yê dewleta tirkî ser.

Kalkanî herişê Xakûrkê ser o da zanayene badê ke DAÎŞ Teşrîna Verêna 2017î de Reqqa de bin kewt, hetêk ra hêrişê Kerkûkî ame kerdene, dima zî Kanûna 2017î de vera Xakurkê û Çileyê 2018î de vera Efrînî dest bi hêrişî ame kerdene. Kalkanî va ‘Nîsana 2018î de resayî Girê Lêlîkanî û nika 25-26ê Gulane ra tîya de hêrişê leşkaran esto’.

Kalkanî va ‘dewleta Tirkî wazena ke Efrîn ra heta Xakurkê dagîr bikero’ û wina domna: “Semedê naye plan, qerar û projeyê înan estî. Wazenê ke leteyanê Rojawan û Başûrî yê Kurdîstanî dagîr bikerê. Hetêkê na herême Efrîn, hetêk zî Xakurkê Bradost o. Wetê ci zî Rojhelatê Kurdîstanî ya, o zî binê destê  Îranî de yo. No qetî têgêrayîşê dagîrkerdişî yo. Rehendê ci yo îdeolojîk qirkerdişê Kurdan o. Wazenê ke Kurdan tarîx ra biesterê. Hetêk ra zî stratîjîk o. Dagîrkerdişê di leteyanê Kurdistanî hedef kenê. Bi hedefêkê stratejikî sînoranê Tirkîya xêze kenê. Ganî bitaybetî Kurdê Başûr û Rojawanî na raştîye bivînê û fam bikerê.”

Nêwazenê serkewtiş rojeve de bimano

Kalkanî va ‘rehendê sîyasî yê nê hêrişan zî esto’ û wina dewam kerd: “Bitaybetî hêrişê peyênî cade verê roşanî û roja roşane de lezûbez ameyî kerdene. Heme giredayeyê weçînitişê Stenbolî yê. Senî ke grevê vêşanîye bi xoverdayîşî faşîzm rê peyser game daye eştene, têgêrayîşê demokrasî îradeya xo xurt kerd, zanayîşo demokratîk bi vila. Têrsê naye ra, seba ke vernîya naye bigêrê û destûr medê serkewtişê grevê vêşanîye rojeve de bimano, cade dest bi hêrişê Xakurkê kerd. Bi naye wazenê ke rojeve bibedilnê. Rehendê ci yê rojeva sîyasî zî esto. No het zî waştişê serkewtişê weçînayîşê Stenbolî yo. Ganî herkes nayî bivînê. Eşkera yo ke semedê reygirewtişî no hêriş yeno kerdene.”

Nika do kam 7 giran bipawo?

Kalkanî bale ant ser hetê leşkerî û wina va: “Rehendê hîrêyinî zî eskerî yo. Rehendê eskerî de senî ke medyaya AKPyî vana wina nîyo, raştîya ci wina ya; Înan par Qilê Lêlîkan tepişt. Gerîlayan vera înan de her roje çalakîyî viraştî. Semedê pawitişê Lêlîkanî dormeyê ci sey xetê asayîşî ame girewtene. Wazenê ke dewanê derûdorî zî veng bikerî. Hêzê PDK û Iraqî benê birîndar. Wazenê ke semedê pawitişê Lêlîkanî ê dewan veng bikerî. Semedê pawitişê yew girî 7 girî tepiştî, nika do kam ê 7 giran bipawo? Sey Efrînî wazenê ke Bradost zî veng bikerê. Ûca de tewr tay 150 dewî estî. Tena Dola Xakurkê de tewr tay 15 dewî estî. Sinorê Rûbarok-Şemzînan ra heta Sîdekanî bi seyan dewî estî. Seba ke dewijî bitersê û biremê, danê dewan ro. No tena têgêrayîşê dagîrkerdişî nê, têgêrayîşê qirkerdiş û surgunî yo. Pakkerdişê etnîkî yeno kerdene.”

Wa vera dagîrkerîye de heme kurdî bibî yewe

Kalkanî va ‘na çarçewa de eşkera yo ke dewleta Iraqî ke vera hêrişan de bêveng a, pêkerdişê ci bi dewleta Tirkî esto’ û wina qedêna: “Na nuqta de ma wazenê ke îdareyanê PDK-YNKyî hem hîşyar bikerê hem zî veng bidê înan. Ma eşnawenê ke PDK mîyanê nê îtîfaqî de yo. Wina zî eşkera aseno ke hêzê PDKyî pîya bi artêşa Tirkî vera PKKyî de operasyon virazeno. Eke raşta wina yo, no çîyêko zaf bitehluke yo. Eke PDK sey 1997 Başûr de vernîya gerîlayî bigêro, meverdo pîya bi şarî vera dagîrkerîya dewleta tirkî de xover bido, no yeno manaya şerî. Peynîya nayî beno şer, wa her kes bizano. Eke sey qoricîyanê vakûrî piştî bidîyo qetilkar-faşîstanê Tirkî no beno sebebê şerî. Vengdayîşê ma vera dagîrkerîye de xoverdayîşo hempar o.”

ANF / BEHDÎNAN 

Yazarın diğer yazıları

    None Found