Ma Şêx Seîd û Seyîd Rizayan ra girewt

Vera tayînbîyayîşê qayûman û xespbîyayîşê şaredarîyanê Amed, Wan û Mêrdînî de reaksîyonî dewam kenî. Bi taybetî nê hîrê bajaran û xeylê cayanê bînan de çalakîyê protestoyî yenî kerdene. Çalakîya ke Cadeyê Lîse yê Amedî de roja 24. de bi beşdarbîyayîşê seyan kesan dewam kerd.

Çalakgêran ra Refaî Barano ke Hemserekê Partîya HDPyî yê Bismilî yo û verê cû bi Qerarnameyê Hukmê Qanûnî de melatîye ra amebi îxraçkerdene, qisey kerd û dîyar kerd ke înan mîrasê xoverdayîşê xo Şêx Seîd û Seyîd Rizayan ra girewto.

Baranî vera polîtîkaya qayûmî de reaksîyon nîşan da û wina va: “Zalimî de sînor çin o. Ayeta 148. de ‘Homa nêwazeno ke qala xirabe bêro vatene, labelê o ke raştê neheqîye ameyo sewbîna yo’ yeno vatene. Yanî ma seba înan se vajî zî Homa qusûrê ma ra nêewnîyeno. Çimkî ma mazlûm î. Pêxemberê ma mazlûm bi û vera neheqîye de sere nêrona. Ma zî bawerîya xo bi pêxemberan ardo û ma zî yenî surgunkerdene, erzîyenî zîndanan û kişîyenî. Ma do vera zulmî de sere nêronî.”

Ê do tesilî vînî bikerî

Baranî va ‘lazimîya ma bi merdimanê eşkenî bifikiryî esta’ û wina dewam kerd: “Dînê Îslamî de zulm rê ca çin o û tesilî do polîtîkayê qayûman vînî bikera.  Tîya de polîsan dormeyê ma girewto. No fotografê faşîzm û putperestî ya. O wext leşkeranê putperestan estoran weniştêne, ewro zî bi wesayîtê zirxin û TOMAyan wenîşenî. Ma mîrasê xoverdayîşî Şêx Seîd û Seyîd Rizayan ra girewto. Eke kalikanê ma sere bironayêne, ma rê mîrasê bêrûmetîye mendêne, labelê ê wexto ke îdam bîyî zî sere nêrona. Ma zî sere nêrona, wa no înan rê bibo derd.”

MA / AMED

Yazarın diğer yazıları

    None Found