Mabênê 10 serran de ma eșkenê her çî bivurnê

Hemserekê Pêroyî yê HDPyî Sezaî Temellîyî pare kerd ke hewcedarîya utopyaya newîye esta û vat: “Serra 2020î eşkena biba destpêkê 10 serranê neweyan û nê 10 serranê neweyan de ma eşkenê her çi bivurnê.”

Konferanso 2. ê Tabîî yê Meclîsê Ciwanan ê Partîya Demokratîke ya Şaran (HDP) Merkezê Pêroyî yê HDPyî de bi şîara ‘’Ma sere wedarenê, xo ver danê, ma do faşîzm çin bikerê’’ ame kerdene.

Endamê Meclîsê Ciwanan ê HDPyî Şerîf Adlimî destpêkê konferansî de qisey kerd û şorişgêrê kurdî Sakîne Cansiz, Fîdane Dogan û Leyla Şaylemez yad kerdî ke 9ê çeleyê 2013î de Paris de ameyî qetilkerdene.

Adlimî bal ante tecrîdê Rayberê Kurdî Abdullah Ocalanî ser û vat: “Tevrîdê vera Birêz Ocalanî seba vergirewtişê têkoşînê ciwanan o.”

Adlimî vat: “Ganî ma tecrîd bişiknê. Karo verên ê têkoşînê ma no yo. Ma do tecrîd çin bikerê. Ma venga ciwanan, cinîyan, kedkaran danê ke tewrê meclîsê ma bibê, ma faşîzm çin bikerê û têkoşînê xo pîl bikerê. Se beno wa bibo ma zanenê ke netîce do bêhempa bibo.”

Ganî ma vînayîşê xo aver berê

Hemserekê Pêroyî yê HDPyî Sezaî Temellîyî zî konferans de qisey kerd û vat ke sîstemo nikayên her çi rişneno. Temellîyî wina dewam kerd:

“Coka hewcedarîya utopyayêke esta. Şoriş nişka ra nêno. Ganî merdim hêzê şorişgêrîye awan bikerê. Serra 2020î eşkena biba destpêkê 10 serranê neweyan û mabênê nê 10 serran de ma eşkenê her çi bivurnê. Tesaduf nîyo ke Rojhelatê Mîyanênî nika merkezê sîyasetê globalî yo. Naye ra bizanê ke no sîstem do çin bibo.  Rojawan nîşanê hêzêkê vurnayîş û bedilnayîşî yo. Ganî ma Rojawan bi ferasetêkê şorişgêrîye biercnê. Ma eşkenê nê sîstemî bivurnê. Naye ra zî ganî ma vînayîşê xo aver berê.”

ENQERE

Yazarın diğer yazıları

    None Found