Meclîsê Girê Spî seba pawitişî amade yo

NAZIM DAŞTAN / MA / GIRÊ SPÎ

Herêma Biewle ke mabênê Girê Spî û Serêkanîye de 5 kîlometre hîrayîye de awankerdişê ci yeno fikirîyayene de heta nika çarçewaya pêroyî ameya dîyarkerdene. Herêma ke mabênê Amerîka û Tirkîya de ameya dîyarkerdene rê hêzê QSDyî zî beşdar benî. Goreyê çarçewaya pêroyî eke Herêma Biewle bikewa fealîyet, o wext do Meclîsê Leşkerî yê Girê Spî zî pawitişê herême de ca bigîro. No meclîs 21 komîte ra pê yeno û mîyan de şerwanê Ereb, Kurd, Tirkmen û Armenîyî estî. Meclîs do ewleyîya herême bigîro.  Babete ser o fermandaranê meclîsî ra Rîyad Xelef El Xemîsî qisey kerd û derheqê averşîyayîşan de melumatî dayî. Fermandar Xemîsî va ‘hedefê esasî yê Tirkîya o yo ke bin nameyê munaqeşeyanê ‘Herêma Biewle’ de bikewo herême û wina domna: “Tirkîya wazena bi herêma biewle erdanê ma dagîr bikero. Ma nêyî qebul nêkenî.”

Ganî heme herême tede bibo

Xemîsî da zanayene Herêma Biewle ke qala ci yena kerdene 5 kîlometre hîrayî û 100 kîlometre zî dergîya ci ya û wina va: “Labelê ma wazenî ke wa heme herême bikewo mîyan. Ganî Herêma Biewle seba merdimanê ke nê erdan DAÎŞ ra rizgar kerd bêro îlankerdene. Labelê Tirkîya wazena ma û erdanê ma terorîze bikera. Ma nêwazenî ke Tirkîya bikewo erdanê ma mîyan. Eke hêrişê ma bikerî, ma do xo bipawî.”

Yazarın diğer yazıları

    None Found