‘Nêşenê yewbînan ra  dûrî bikerî

“Tecrîd verê cû seba çaresernêbîyayîşê problemê kurdî ameyêne domnayîş, labelê nika zafane seba polîtîkaya teberî yeno domnayîş.”

Rayberê Şarê Kurdî Abdullah Ocalanî ser o tecrîdo ke nimûneya ci ti cayê dinya de çin a, yeno domnayîş û nizdîyê 3 serrî yo ti xebere Ocalanî ra nîna girewtiş. Reyna 2011 ra nata zî avûkatê Ocalanî nêşênî muwekkîlê xo reyde pêvînayîş bikerî.

Babete ser o Rojnamegere Yuksel Gençe û Hemsereka HDPyî ya Riha Ayşe Surucuye qisey kerdî. Rojnamegere Gençe dîyar kerde ke tecrîd verê cû bêçareserîya problemê kurdî reyde eleqeder bî, labelê nika tecrîd seba polîtîkaya teberî yeno domnayîş û wina va: “Cuya alternatîfe ke hetê Ocalanî ra yena pawitiş, tena hetê Tirkîya ra nê, hetê hêzanê emperyalan ra zî sey tehlukeyî yena dîyayîş û nîna qebulkerdiş. Wazenî na paradîgmaye bêrayber biverdî. Cok ra tecrîdî bica anî.”

Gençe va ‘Ocalanî Newroza 2013î de seba Rojhelatê Mîyanênî yo newe mesajêk dabî’ û wina dewam kerde: “Mesajê ê wextî hetê Tirkîya ra ame astengkerdiş û destûr nêdîya o mesaj bierzîyo pratîk. Çimkî Ocalanî ê mesajî de qala Rojhelato Mîyanênî yo newe û meseleya azadîye kerdêne. Reyna mesaj de ameyêne vatiş ke seba çareserîya krîzî lazimîye rêxistinîya şaranê Rojhelatê Mîyanênî esta. Labelê Tirkîya û hêzê hegemonîkî şer eştî dewre.”

Kurdê AKPyî zî tesîr benî

Gençe daye zanayîş ke hukmat û dewlete kurdan kerdî mehne û beşdarê şerê parekerdişî yê Rojhelatê Mîyanênî bîyî û wina va: “Bi ti hawayî nêwazenî kurdî bibî wayîrê statuyêkî. Nê polîtîkayê hukmatî herême de benî sebebê etirîyayîşanê cîddîyan. Nê polîtîkayan ra kurdê AKPyî zî tesîr benî. AKP nika weçînayîşî qezenç bikero zî nêşêno Tirkîyayêka newe awan bikero. Nika nîjadperestîye yena xebetnayîş û beno ke no bibo sebeb ke Tirkîya parçe bibo û prosesêko kaosin dest pêbikero.”

Estena Ocalanî do azadîye bîyaro

Surucuye zî va ‘Ocalanî bi felsefe û fikrê xo xerîtayêka newe daya şaranê Rojhelatê Mîyanênî ver’ û wina domnaye: “Ocalan seba cinîyan rayberêko muhîm o û cuyêka ortaxe û seyyewbînan veto raşte. Cok ra Birêz Ocalan û 4ê Nîsane taybet î. Birêz Ocalan seba ke na cografya de problemê aştî û azadîye nêrî çareserkerdiş, yeno tecrîdkerdiş. Reyna destûr nêdîya ma şêrî Amara. Heme rayîrî ameybî padayîş û xeylê kesî tepişîyayî. Yanî merdim bi hawayo kilmî vajo, tersenî ke kurdî wayîrê Birêz Ocalanî bivejyî. Cok ra hewl danî Birêz Ocalanî rojeve ra wedarnî û şarî ra dûrî bikerî.”

Şarê ma mesajê xo da

Surucuye dewamê qiseykerdişê xo de wina va: “Dewleta tirkî nêşêna Ocalan û kurdan yewbînan ra dûrî bikera. Çimkî Birêz Ocalanî bi fikrê xo xo mîyanê kurd û şaranê Rojhelatê Mîyanên de dayo qebulkerdiş. Ê çiqas qedexe bikerî û astengîyan vejî zî ma resayî hedefê xo. Şarî mesajê ‘tecrîd do bêro şikitiş û Ocalan azade bibo’ da.”

MERKEZÊ XEBERAN 

Yazarın diğer yazıları

    None Found