No şerê estbîyayîş û çinbîyayîşî yo

7 rojî yo ke Hêzê Sûrîyeya Demokratîke vera hêrişê dagîrkerîye yê artêşa Tirkî û çeteyanê ci de xoverdayîşêko bênimune nîşan dano. QSDyî heta nika gamêk zî bi artêşa Tirk û çeteyanê ci nêdaya eştene û derbê girdî dayî piro. Cinîya bi nameyê Zozan Ciwane daye zanayene ke no şerê estbîyayîş û çinbîyayîşî yo, cok ra ganî Kurdî biwerzî payan ser.

Artêşa Tirkî 9ê Teşrîna verêne ra nata bi teyara, tanq, top û çeteyanê xo hêrişê Vakur û Rojhelatê Sûrîye keno û heta nika xeylê kesê sîvîlî qetil kerdî. Artêşa Tirkî bi hêrişê dagîrkerîye hewl dano heme qezencanê Kurdan hedef bigîro, coka cinî, doman û extîyar nêvano herkesî qetil keno.

Vera hêrişê dagîrkerîye yê dewleta Tirkî û çeteyanê ci de Hêzê Sûrîyeya Demokratîke (QSD) bi xoverdayîşêko bênimune têkoşîn danî. Heta nika xeylê leşker û çeteyê artêşa Tirkî kişîyayî, panzer û tanqê ci ameyî îmhakerdene û leşker û çeteyî gamêk zî aver nêşîyî.

Serêkanîyê de vizêr şewe ra nata pêrodayîşî bêmabên dewam kenî. Heta nika heme hêrişê artêşa Tirk û çeteyanê aye ameyî vindarnayene. Na çarçewa de bombardumanê teyarayan û erzîyayîşê top û hewanan dewam keno. Netîceyê pêrodayîşan de 2 panzerî û dozerêk ameyî îmhakerdene. Netîceyê çalaki û pêrodayîşan de 27 leşkerî kişîyayî.

Ma heqdar î û ma do qezenç bikerî

Hepsîyanê PKK û PAJKî îzehetêk da û dîyar kerd ke ti teknîk û ti artêşe nêşêno bi xoverdayîşê şaran û wina dewam kerdo: “Kurdî ancax yewîya xo awan bikerî û estena xo bipawî eşkenî vera hêrişan de bivinderî. Ma veng danî rayapêroyîya mîyanneteweyî û roşnvîran ke wa bibî vengê şarê ma û hesas bibî. Bawerîya ma bi hêz, cewher û heqdarîya şarê ma esta. Do xeta heqîqete, sîyaseto demokratîk û aştîye qezenç bikera. Ma do seba ci şer bikerî û qezenç bikerî.”

Ganî heme Kurdî biwerzî payan ser

Xoverdakara cinîye Zozan Ciwane ke xoverdayîşê Serêkanîyê de ca gêna, daye zanayene ke ê do heta peynîye vera dagîrkeran de xover bidî û destûr nêdî dagîrkerîye. Zozan Ciwane wina dewam kerde: “Şervanê QSDyî bi xoverdayîş û kedêka girde vera dewleta Tirkî de şer kenî. Coka leşker û çeteyê artêşa Tirkî do nêşênbî Serêkanîyê dagîr bikerî. Nika pêrodayîşê şîddetinî qewimîyenî. Hêrişî çiqas benî wa bibî, ma do xoverdayîşê xo bidomnî. Ma do heta peynî xover bidî û destûr nêdî ke dewleta Tirkî erdê ma dagîr bikero. No şerê estene û çinbîyayîşî yo, coka ganî heme Kurdî biwerzî payan ser.”

Qesra Elysee dimayê kombîyayîşê Konseyê Asayîşî îzehetêko nuştekî da û îfade kerd ke seba qetîkerdişê asayîşî do tedbîran bigêrê. Badê ke Amerîka qerarê peyserantişê leşkeranê xo girewt, qerarêko winasî ame girewtene. Elysee da zanayene ke ê hêrişanê Tirkî ‘bi hewayêko pêt’ şermizar kenê û seba ke nê hêrişan vindarnê xebatanê diplomatîkan domnenî. Îzehet de wina ameyo vatene: “Ganî ma hîna zêde goş bidê ke ma nêverdê reyna DAÎŞ bivejîyo raşte. Rîyê operasyonê Tirkîya ra rîsko ke terorîstê DAÎŞî biremê nêame hesabkerdene. Seba asayîşî do tedbîrî bêrî girewtene.” 

 AMED

Yazarın diğer yazıları

    None Found