Ocalan yan azade beno yan azade beno

Çalakîyê ke vera tecrîdî de yenî viraştene domîyenî. Bitaybetî Ewropa de xeylê bajaran de çadirî ameyî ronayene û vilawekî ameyî vila kerdene. Çalakgêrî dîyar kenî ke heta ke Rayberê Şarê Kurdî Abdullah Ocalan azade nêbo, aştîye nîna Tirkîya û Rojhelato Mîyanên û vatî ‘Ocalan yan azade beno yan azade beno’.

Rayberê Şarê Kurdî Abdullah Ocalanî ser o tecrîdo ke nimuneya ci ti cayê dinya de nêameyo dîyayene, yeno domnayene û nizdîyê 2 serrî yo ke ti xebere tira nîna girewtene. Seke yeno zanayene Ocalan tewr peynî birayê xo Mehmet Ocalanî reyde pêvînayîşêko kilm viraştbi û o wext ra nata îzolasyonêko gird esto.

Kurdistanî û dostê înan yê ke Ewropa de cuyenî, vera tecrîdî de vejîyayî raşteyan û reaksîyon nîşan dayî. Çalakîyan de tecrîd yeno şermizar kerdene û azadîya Ocalanî yena waştene. Na çarçewa de bajarê Parîs û Marsîlya yê Fransa de, bajarê Vîyana yê Avusturya de, bajarê Saarbrucken, Mannheîm û Frankfurtî yê Almanya de, bajarê Uzern, Solothurn û Zurîhî yê Swîsre de û bajarê Stockholmî yê Swêdî de çalakîyê tewir bi tewirî ameyî viraştene.

Xeylê cayanê Ewropa de çadirî ameyî ronayene û vilawekî ameyî vila kerdene. Temsîlkarê xeylê rêxistine û dezgeyan beşdarê çalakîyan bîyî. Çalakîyan de tecrîd ame şermizar kerdene û sîyasetmedarî qisey kerdî. Çalakîyan de pankartê ‘Ocalan rê Azadîye, Kurdistan rê statu’ ameyî aliqnayene. Reyna posterê Ocalanî û flamayê PKK û TJK-Eyî ameyî berz kerdene. Çalakgêrî vatî ‘ê do etirîyayîşê xo heme Ewropa de nîşan bidî’.

Fikrê Rayber Apoyî ra tersenî

Sîyasetmedarê kurdan Murad Ceylanî Parîs de qiseykerdişêk kerd û wina va: “Tecrîdo ke Rayberê Şarê Kurdî Abdullah Ocalanî ser o yeno domnayene, heme şaranê Kurdistan û Rojhelatê Mîyanênî ser o yeno domnayene. Tecrîd bêehlaqî û bêhuqûqî yo. Ma kurdî tecrîd şermizar kenî û ma do tecrîdî qebul nêkerî. Ma esîrîya Rayberê xo qebul nêkerd û ma do qebul nêkerî zî. Ez bawer kena ke do ti kes tecrîdî qebul nêkero. Çimkî azadîya Rayber Apoyî, azadîya herkesî ya. Projeyê Neteweya Demokratîke seba herkesî yo. Ewro heme dezgeyê mîyanneteweyî vera tecrîdî de bêveng î. Çimkî ê fikrê Rayber Apoyî ra tersenî.”

Ganî herkes payan ser o bo

Hemsereka DKTMyî Dexil Îbrahîme zî qisey kerde. Dexil Îbrahîme dîyar kerde ke azadîya Ocalanî yena manaya azadîya kurdan û wina va: “Ewro ma seba azadîya Rayber Apoyî tîya de çadire akerda. 19 serrî yo ke kurd û dostê kurdan seba ke Rayberê înan esîr ameyo girewtene, payan ser o yî. Rayberê ma 19 serrê bînî zî esîr bimano ma do çalakîyan bivirazî. Çimkî Rayberê ma rûmetê ma yo, cuya ma yo. Ganî herkes seba Rayberî payan ser o bo.”

Yan azade beno, yan azade beno

Kesê ke beşdarê çalakîyan bîyî ra yewe zî Salîh Goko ke serra 2012î de seba azadîya Ocalanî tena sereyê xo 50 hezar îmze arê daybî yo. Gokî va ‘fikir û felsefeya Ocalanî bi mîlyonan kesan rê benî îlham’ û wina domna: “Heta ke Ocalan azade nêbo, Tirkîya û Rojhelato Mîyanên de aştîye nêbena. Seba ke Ocalan bi hawayo rew bireso azadîya xo, ganî herkes beşdarê têkoşînî bibo. Ocalan yan azade beno, yan azade beno.”

 ANF  / BRUKSEL

Yazarın diğer yazıları

    None Found