Ocalanî destê xo dergê Tirkîya kerd

Sîyasetmedar Hatîp Dîcleyo ke donemêk Heyetê Îmrali de ca girewt, derheqê mesajê Ocalanî de va ‘Ocalanî destê xo wextanê tewr zehmetinan de dergê Tirkîya kerd’ û wina domna: “Eke Tirkîya qîmetê nê destî bizano, do heme probleman ra bixelisîyo û Rojhelato Mîyanên de bibo merkezê rindîyan.”

SADÎYE ESER / MA / STENBOL

Rayberê Şarê Kurdî Abdullah Ocalanî 7ê Tebaxe de avûkatanê xo de pêvînayîşêk viraştbi û o pêvînayîş de mesajê muhîmî daybî. Sîyasetmedar Hatîp Dîcleyo ke demêk Heyetê Îmrali de ca girewt, derheqê mesajê Ocalanî û qewimîyayîşanê Rojawan û Vakurê Kurdîstanî de qisey kerd û hişyarîyê muhîmî kerdî.

Dîcleyî mutabakatê ‘Korîdorê Ewleyîye’ yê ke mabênê Amerîka û Tirkîya de yeno qiseykerdene ser o da zanayene ke Tirkîya bi nê mutabakatî hewl dano seba dagîrkerîye tesdîqê Amerîka bigîro. Dîcleyî wina domna: “Xora yeno zanayene ke dagîrkerîya Efrînî zî bi tesdîqê Rûsya amebî kerdene. Eke Rûsya destûr nêdayêne, înan nêşênayêne Efrîn dagîr bikerî. Ma nika nêzanê teferuatê nê mutabakatî çî yî. Eke dîyar bibî, o wext merdim eşkeno ser o qisey bikero.”

Dîcleyî bale ante amancanê Tirkîya yê dagîrkerdişê Rojawanî ser û wina va: “Na dagîrkerîye de 3 amancê Tirkîya estî. Amanco yewin sînorê Mîsaki Mîllî yo; Tirkîya wazena erdanê xo wina derg bikera û na çarçewa de Kurdan zî sey Armenîyan çin bikero. Amanco dîyin qedênayîşê îdareyê xoserî yê ewja yo; Çimkî îdareyê ewja Tirkîya tersneno. Ê seba xo bitehluke vînenî, cok ra wazenî ke dagîr bikerî. Amanco hîrêyin zî seba ke destê DAÎŞî Îraq de xurt bikerî, çîyêko winasî kenî; çimkî Rojawan û Vakurê Sûrîye de vera DAÎŞî de têkoşînê tewr gird Kurdan da. Nika zî DAÎŞ hewl dano Îraq de xo newe ra xurt bikero. Na dagîrkerîye reyde destek dîyeno ci.”

Bedilnayîşê nufûsî sucê merdimîye yo

Dîcleyî qiseykerdişê xo de qala Korîdorê Ewleyîye kerde û wina va: “Bi nê korîdorî hewl danî Kemberê Ereban xurt bikerî û Kurdan ewja ra vejî. Yanî Tirkîya hewl dana sey Efrînî Kurdan bi temamî ewja ra veja. Înan Efrîn de se kerd? Efrîn de Kurdî ameyî vetene û herinda înan de keyeyê Ereb û cîhadîstî ameyî bicakerdene. Seke yeno zanayene bedilnayîşê nufûsî sey sucê merdimîye û qirkerdiş hesibîyeno. Tirkîya bi nê korîdorî manevrayêk kerde. Çimkî nêşênayêne bikewo, o wext do çimê dinya de rezîl bibîyêne. Eke bikewtêne, o wext do sey Vîetnamî bibîyêne. Merdim eşkeno vajo ke Amerîkaye ci xelisna.”

Ger qîmetê ci bizanîyo, problemî çareser benî

Dîcleyî bale ante tarzê çareserîye yê Ocalanî ser û wina va: “Birêz Ocalanî 7ê Tebaxe de derheqê çareserîye de vatbi ‘Nê problemî ancax bi ruhê Qanûno bingeyî yê 1921î çareser benî’. O qanûno bingeyî de heme şarî estî. Reyna ê qanûno bingeyî de zaf muhîmî dîyayêne îdareyanê herêmî. Birêz Ocalan şertê zehmetinan yê Tirkîya de daxî rayîrê çareserîye nîşanê Tirkîya dano. Merdim eşkeno vajo ke Birêz Ocalan seba ke Tirkîya bixelisno, destê xo dergê ci keno. Çimî Tirkîya hetê ekonomî, leşkerî, sîyasî, dîplomatîk û sewbîna de zaf teng bîya. Birêz Ocalan nê şertan de vano ‘ez seba çareserîye amade ya’. Tîya de şar û Tevgerê Azadîye zî amade yî. Ger qîmetê ci bêro zanayene, problemî çareser benî.”

Çi ame sereyê Sedamî, do bêro sereyê înan zî

Dîcleyî qiseykerdişê xo de qala vatişê Ocalanî yê ‘Çi Kurd eşkeno bê Tirkî, çi zî Tirk eşkeno bê Kurdî estena xo bidomno’ kerde û wina va: “Birêz Ocalanî pawitişanê xo de qala na babete kerda. Merdim tarîx ra zî biewnîyo, vîneno. Tarîx ra nata çi Anatolîya eşkena bê Mezopotamya, çi zî Mezopotamya eşkena bê Anatolîya estena xo bidomno. Cok ra ganî problemê Kurdî yê Tirkîya çareser bibî. Birêz Ocalan na çarçewa de pêvînayîş de vatişê ‘gelo do huqûqê Kurdan se bibo?’ vano. Ziwanê dayîke ra heta îdareyê herêmî heme çîyî pawitişanê Birêz Ocalanî de estî. Feydeyê nînan Tirkîya rê esto. Birêz Ocalan no semed ra vano ke ‘bawerîya mi esta û ez seba çareserîye amade ya’. Redkerdişê Kurdan rayîrê Sedamî yo. Çi ame sereyê Sedamî, do bêro sereyê Ergenekon, AKP û MHPyî zî. Cok ra ez vana ke Birêz Ocalanî destê xo dergê Tirkîya kerdo. Eke qîmetê ci bizanî, o wext Tirkîya Rojhelato Mîyanên de beno merkeze rindîyan.”

Yazarın diğer yazıları

    None Found