Roje roja girdkerdişê xoverdayîşî ya

Teyarayanê artêşa Tirkî hêrişê dormeyê Kampa Mexmûrî kerd. Netîceyê hêrişî de 2 kesî birîndar bîyî. KCDK-E û TJK-E hêrişî şermizar kerdî û veng dayî Kurdanê welatperweran ke wa vera hêrişî de bêveng nêmanî. Her di dezgehan zî dîyar kerd ke xebera Milletê Yewbîyayeyî û PDKyî hêriş ra esta.

Vizêr şewe teyarayanê artêşa Tirkî ke demêko derg o hewl danî Başûrê Kurdîstanî dagîr bikerî, hêrişê Kampa Şehîd Rustem Cûdî (Mexmûr) bombardûman kerd. Goreyê xeberanê ke çimeyanê Mexmûrî ra ameyî girewtene, dormeyê kampe ameyo bombardûmankerdene.

Goreyê zanayîşanê verênan netîce de kes nêmerdo, labelê 2 kesê ke bi tesîrê teqayîşî binê herre de mendî, birîndar bîyî û rewşa înan baş a. Dimayê hêrişî roniştoxê kampe keyeyanê xo ra vejîyayî û reaksiyon nîşan da.

Hêrişo ke saetanê şewe de ame viraştene de hîrê rayî bombayî ameyî eştene û wextê hêrişî de firdayîşê keşîfî zî ameyî kerdene. Roniştoxanê kampe ra keso ko qisey kerd, vat cayê sivîlan hedef ameyo girewtene.

Verê cû zî xeylê hêrişî amebî kerdene

Dewleta Tirkî menganê peyênan de vera cayanê sivîlan ê Başûrê Kurdistanî sîtematîk hêrişan kena. Teyareyanê şerî yê Tirkî roja Îneyî dewa Spîndarî ya qezaya Amedîye ya Dûhokî bombardûman kerde. Hêrişî de hîrê sivîlî birîndar bîbî. Aşma Hezîrane de hêrişê hewayî yê vera herêma Kortekî yê dewleta Tirkî de hîrê sivîlî ameybî qetilkerdene û panc zî birîndar bîbî.

Kamapa Macîran ê Mexmûrî ke 12 hezar macîrî tede yê raya verêne nêya ke bena hedefê dewleta Tirkî. 13ê Kanûn a 2018î de hêrişê hewayî yê dewleta Tirkî de çar sivîlanê ke asayîşê Mexmûrî de wezîfedar bî, merdbî.

Wa Kurdî wayîrê Mexmûrî bivejyî

Dîwanê Hemserekîye yê KCDK-E îzehetêko nuştekî da û dîyar kerd ke kampe bin kontrolê Milletê Yewbîyayeyî de ya û wina dewam kerdo: “Ganî hêzê mîyanneteweyîyî bêveng nêmanî. Bêvengîya înan nîşan dana ke ê zî hemparê sucî yî. Reyna bêvengîya îdareyê Başûrî zî babeta şermî ya. Nê hêrişê ke dagîrkerîye amanc kenî ver sîvîlî yenî hedefgirewtene. Ma veng danî heme Kurdanê welatperweran ke wa wayîrê Mexmûrî bivejyî û dagîrkerîye protesto bikerî.”

Ganî Kurdî vera hêrişan de bêveng nêmanî

Koordînasyonê TJK-E zî vera hêrişî de îzehetêk da û hêriş şermizar kerd. Koordînasyonî îzehetê xo de wina vato: “Dewleta Tirkî ya faşiste Mexmûr de bi teyarayan hêrişê sîvîlan kerd û hêriş de cinî û domanî ameyî hedefgirewtene. Nê hêrişî îmhayê Kurdan hedef gênî. Milletê Yewbîyayeyî û PDK no hêriş ra xebera înan esta. Heto bîn de nê hêrişî raştê serrgêra şorişê Rojawanî ameyî û no zî tesaduf nîyo. Beno ke siba vera Şengal û Rojawanî de zî hêrişî bibî. Ganî ma bizanî ke nê hêrişê sifteyînî û yê peyênî nîyî. Cok ra ganî Kurdî vera hêrişan de bêveng nêmanî. Ma nê hêrişî şermizar kenî û veng danî heme Kurdê ke Ewropa de cuyenî ke wa wayîrê Mexmûrî bivejyî. Roje roja girdkerdişê xoverdayîşî ya.” n AMED

Ciwanê mexmûrijî ameyî tepiştene

Heto bîn ra 2 rojî vere Hewlêr de vera konsolosxaneyê Tirkan de hêrişêka amebî kerdene û netîceyê hêrişî de 3 kesî merdbî. Hêrişî ra dima Hewlêr de hêzê asayîşî eştî keyeyanê ciwananê mexmûrijan ser. Netîceyê sereştişan de 16 cinîyê ciwanî ameyî tepiştene. Wextê sereştişan de keyeyê ciwanan ame serûbinkerdene û ame musayene ke wextê sereştişî de kesê ke Tirkî qisey kerdênê zî mîyanê sereştoxan de estbîyî. Kesê ke ameyî tepiştene, ameyî berdene bi Asayîşê Hewlêrî. Nê kesan ra 11 kesî serbest veradîyayî, labelê 5 kesî hîna zî tepişte yî. Kesê ke veradîyayî, dîyar kerd ke hêzê asayîşî înan ra vato ‘ma şima bi şaşî tepişto, ma do şima veradî’. Labelê aqûbetê 5 kesan nîno zanayene.

Yazarın diğer yazıları

    None Found