Rojnamegerî forûm ra bihêvî yî

Merkezê Cigêrayîşanê Stratejîkan ê Rojawanî mabênê 6 û 8ê Temmuze de vera DAÎŞî de forûmêko mîyanneteweyî viraştbi. Beşdaranê forûmî ra Ergun Babahan, Hayko Bagdat û Arzû Demîre qalê dîyayîşanê xo kerdî.

Beşdaranê forûmî ra rojnameger Babahanî va ‘Rojawanî konferansêkê mîyanneteweyî yê xeylî serkewteyî rê meymandarî kerde’ û wina domna: “Xeylî cayanê dinya ra xeylî ekspertê DAÎŞî, huqûqnas, psîkolog, pawitoxê cinîyan û alimî tewrê konferansî bîyî. Têkoşînê vera DAÎŞî de Ewropa zî dej ant, labelê înanê ke bedelo tewr giran da Kurdî û bi taybetî zî Êzidîyî bîy. Na yewe ra ganî babeta DAÎŞî tim rojeve de bêro verdayene. Na babete de îdareyê Rojawanî xeylî qerardar o.”

Hayko Bagdatî va ‘mi tîya de DAÎŞijê esîrî dîyî’ û wina dewam kerd: “Pîya bi tayê rojnamegeran ma çend DAÎŞijan dir qisey kerd. Bitehluke bi ke merdim merdimanê ke bîyê sebebê a barbarîye bivîno. Mi înan ra yewî dir pêvînayîş kerd. Çîyo ke mi dî û yo ke verê nikayî televîzyon de dîyo yewbînan ra xeylî cîya bî. Tewr zaf YPGyijan mi ser o tesîr kerdo. Bi taybetî zî gama ke ez şîya şehîdgehê Kobanê nê çîyî mi ser o zaf tesîr kerd. Tîya de tabûrê Suryanîyan û yê Armenîyan estê. Tabûranê Ermenîyan mi ser o xeylî tesîr kerd. Seba ke Ermenîyan dimayê qirkerdişî ra gama yewine qey pawitişê heqanê xo, seba ke vera xirabî de şer bikerê, silehî girewtî.”

Ganî destek bêro dayene

Beşdaran ra rojnamegere Arzû Demîre zî daye zanayene ke vatişê ‘ganî çeteyî Vakur û Rojhelatê Sûrîye de bêrê muhakemekerdene‘ yo ke netîceyê konferansî de ame dîyarkerdene vatişêko xeylî muhîm o. Demîre wina dewam kerde: “Babetêka bîne zî a ya ke tayê herêman de hewna zî bingeyê DAÎŞî esto. Cayanê ke wextêko derg tede serdest bîyî xo rê bingeyêk aferna. Îdareyo Demokratîk o Xoser ê Rojawan û Vakur û Rojhelatê Sûrîye jehrkiştoxê zihnîyetê DAÎŞî yo, loma ganî bêro xurtkerdene.”

SEYÎT EVRAN / RÊBAZ HESEN / ANF /SILEMANÎ

Yazarın diğer yazıları

    None Found