Şagirt bi serkeftinên xwe şa bûn

MURAT MANG / BIELEFELD

Qursa zimanê Kurdî ya ji aliyê Înisyatîfa Malbatên Kurd ya Bielefeldê ve dihat dayin bi dawî bû. Şagirtên tevlî qursê bûne roja yekşemê bi merasimekê sertifîkayên xwe wergirtin.

Merasim li navenda civaka Kurd a Demokratik ya Bielefeld (NCKD-B) hat lidarxistin. Li ser navên Enstîtuya Kurd ya Elmanya (EKA) Şemdîn Çolemergî, Serokê Yekitiya Mamosteyên Kurd ya Ewrûpa (YMK) Abdulqadîr Ulumaskan, Hevserokên NCKD-B Ilkay Erdem-Naif Alkiş, Serokê Însiyatifa ji Kurdistanê re Hevi û Aştî Emine Gozen, Serokê Mala Aştîyê ya Entrenasyonel (IBZ) Johanna Al Shumalî, li Ser Navê Dergahê Elewîyan Zeynep Göçmen, Li ser navê dayikên şehîdan Dayika Xezal, li ser navê sîwana meclîsên Jinên Êzîdî Dayika Eyşan, malbat û gelek zimanhezên Kurdî beşdarî merasimê bûn.

Li ser navê saziya Însiyatîfa malbatên Kurd ya Bielefeldê Zerîfe Huseyîn xêrhatina mevanan kir û wiha qala girîngiya zimanê dayikê kir: ”Ji bo parastina hebûna xwe lazim e ku em zimanê xwe biparêzin. Ev jî erkeke ku dikeve ser milê malbatan.“

Girîngî bidin xebatên wiha

Hevserokê NCKDB Naîf Alkiş jî ji bo organizasyona qursa zimanê Kurdî kêfxweşiya xwe anî ziman û got; “Ez kesên ji bo vê organîzasyonê ked dane pîroz dikim. Dibe ku em li dîasporayê gringiyê bidin zimanê xwe. Xebat hene lê pir lewaz in. Divê em di vê de kêmasiya xwe bibînin. Em ê hewil bidin ku kemasîya xwe ji holê rakin.”

Li ser navê EKA Şemdîn Çolemergî jî got; “Lazim e ku meclîsên me girîngî bidin xebatên wiha. Ev xebatan pirr pîroz in. Em jî weke Enstîtu amade ne ku piştgirî bidin. Divê malbatên me di mal de bi zarokên xwe re bi Kurdî biaxivin.“

Li gel sertîfakayê romaneke Kurdî

Piştî axaftinan mamostê Qursê Rêzan Hesinkar yek bi yek spasiya şagirtên xwe kir û serkeftina wan pîroz kir. Li ser navê sazîyên ku beşdarî dayîna sertifikayan bûne dayikan sertifîka dan şagirtan. Ji bilî sertîfikayan romana bi navê “Malwêran” a mamoste Abdulqadir Ulumaskan nivîsandiye weke diyarî dan şagirtan.

Yazarın diğer yazıları

    None Found