Sey çemêk bîye Berçeme

FARAŞÎN DEMHAT / ANF /BEHDÎNAN

Berçeme Ameda (Miyaser Marangoz) ke fermandaranê YJA Starî ra yewe bîye 27 teşrîna peyêne 2010î de Amedî teba panc embazanê xo şehîd bîye. Berçema Ameda ke bi hesretê welatî serra 1998î de Almanya de tewrê Têgêrayîşê Azadîya Kurdan bîye her vîsta têkoşînê xo yê 12 serran bi çoş, moral û biredarî dewam kerde.

Miyasere Marangoze serra 1984î de qezaya Çêrmûge ya Dîyarbekirî de maya xo ra bîye. Ê keyayanê ke tewr zêde xoverdayîşê kurdan ra wayîr vejîyenê ra yew zî keyeyê Marangozî bî. Serra 1996î de polîtîkayanê înkar û çinkerdişî ra serkewte nêçare mendî ke koçê Almanya bikerê. A zî bi hesreta Kurdîstanî û Amedî Almanya de bîye pîl.

Vera komployê mîyanneteweyî yo ke 9ê teşrîna verêne 1998î de vera Rayberê Şarê Kurdî Abdullah Ocalanî û şarê Kurdîstanî ame kerdene, Ewrupa de tewrê karî bena. Almanya de di serrî kar kena û serra 2000î de verê xo dana koyanê Kurdîstanî yê azadan. A êdî Berçema koyanê Kurdîstanî ya.

Başûr ra heta Amedî Fermandare Berçeme

Berçeme destpêk de Heftanîn, Zap û Qendîlî de têkoşîyena. Tewrê refanê YJA Starî bena û seba hemrayanê xo bena çimeyê moralî. Felsefeya Ocalanî ser o xorîn xebitîyena. Yew demêkê kilmî de koyan de bena yew, gelek herêman de embazanê xo rê hemrayî kena û sewîya bereyî de tewrê têkoşînî bena. Seba nê xeyalê tewr pîlî yê azadkerdişê Amedî  û pêşwazîya Ocalanî warê îstasyonî de bîye. Bi nê armancî verê xo dana Amedî. Serra 2006î ra dima Amedî de sey fermandara YJA Starî bi hawayêkê çalakî tewrê mîyanê têkoşînî bena. Serra 2010î de teba 5 hemrayanê xo yê cinîyan şehîd bena.

Hêrsê aye yê vera dişmenê zêde bî

Waya aye Sema Amada ke bi tesîrê Berçemê Amede tewrê mîyanê têkoşînê azadîye bîye, derheqê domanîya Berçeme de vat “Berçeme domanîya xo de tek ambaza mi bîye. A şîyêne kotî ez zî tey şîyêne. Gege seba na yewe mi ra heredîyayêne û vatêne ‘ganî ti xo rê embazan bivîne’. Mi zî no vateyê aye tewr fehm nêkerdêne. Cuya xerîbîye ma rê zor bîye la tewr zêde Berçeme rê zor bî. Datê ma Ahmet û Mûstafa  hîna serranê 1980î de mîyanê têkoşînê PKKyî de şehîd bîbî. Berçeme çiqas zî domane bo zî şehîdbîyayîşê datanê xo ra serkewte vera dişmenan gelekê bihêrs bîye. Berçeme vatêne “se beno wa bibo ez do şora koyanê Kurdîstanî û heyfê hesretê welatî bigîra.’

Çiqas ke mi rayberî ende mi fehm kerd

Demo ke Berçeme tewrê mîyanê têkoşînî bîye dinya reyêk de mi ser o rijîyaye. Berçeme bê welat, mi zî bê Berçeme nêeşkayêne vindera. Ez ke tewrê têkoşînê azadî bîya mi fehm kerd ke demo ke vatêne ‘ganî to xo rê embazanê bînan zî bivîne’ qestê ay çi bî. Berçemê ke tewrê têkoşînî bîye ez zî dima aye tewrê ci bîya. Çiqas ke mi pawitişnametê Rayberî wende mi şexsîyetê Berçeme hîna zêde fehm kerd. Seba Azadîya Rayber Apoyî mîyanê refanê têkoşînî de ma hemrayî kerde.

Berçeme gelek Heftanînî ra hes kerdêne coka şîya herêma Heftanînî. Seba vîrardişê aye demêk Heftanîn de tewrê karî bîya. Berçeme Amedî ra gelek hes kerdêne, ez zî hes kena, seba ke hesret û heskerdişê hemrayan sey pê yê heskerdişê aye heskerdişê min o. Berçeme bi waştişêkê pîlî şîye Amedî, ez zî wazena şora Amedî û xeyalanê aye yê nêmcetmendeyan temam bika.”

Botan: Fermandara cuye bîye

Gerîlayanê YJA Starî ra Xweza Botane derheqê Fermandar Berçeme Amede de ya ke parwerdeyê xo yê destpêkî yê şerwananê neweyan aye ra girewtîbî wina vat: “Mi embaza Berçeme tewr verî Qendîl de dîye. A fermendara min a destpêkî bîye. Naye ra tesîrê aye mi ser o zaf o. Bi moral û çoşêkê pîlî tewrê cuye bîyêne. Her wezîfe bi hesasîyetê organîzasyonî ardêne ca. Vera kêmasîyan her tim wayîrê helwestî bîye. Mi vinetişê aye de ‘vinetişê yew cinîya şorişgêre’ dîyêne. A fermandara cuye bîye.”

Kalkan: Kesatîya aye adirî ra bîye

Endamê Komîteya Rayraberdişî ya PKKyî Dûran Kalkanî dîyar kerd ke zaf waranê têkoşînî de o rastê Berçeme û keyeyê aye ameyo û vat: “Mi destpêkê serra 2004î de embaza Berçeme Akademîyê Hakî Karerî de dîye. Ciwane bîye, bi vinetişê xo yê dînamîkî her kar kerdêne, karker bîye. Embazanê aye gelek aye ra hes kerdêne. Ma ke yewbînan nas kerd ez musaya ke Çêrmûge ra ya û birakêna Mûstafa Marangozî ya. Na yewe bala mi anite. Çunke Çêrmûge seba mi herêma destpêkî bîye ke mi tey kar kerdîbî. Coka seba mi gelek manadar bîye. Reyna Heval Mûstafa ê embazanê ke tewr verî tewrê têkoşînî bîbî ra yew bî û bi qehremanîya xo ameyêne naskerdene.

Fermandarêka pîle bîye

Berçeme her firsendî de vatêne ‘ez do şora Amedî’. Xora seba naye ameybîye akademî. Biredar û biwaştiş bîye. Demêkê Qendîl de tewrê karî bîye û Amedî de ameye wezîfedarkerdene. Rojnuşteyê xo yê ke derheqê çalakî, şer û cuya a herême de bîye ma rê ruşnaybî. Rojnuşteyanê aye ra ameyêne fehmkerdene ke kesayetêka pîl a xoverdayoxe bîye, hêzê aye yê muşahade û şîrovekerdişî xurt bîy. Vera dişmenî gelek bihêrs bîye. Mi her ke taybetmendîyê cuya Berçeme nas kerdî mi fehm kerd ke  hamcîn hetan ra manena  Embaz Mûstafayî. Embazo Mûstafa kesayetêko biplan û biredar bî.  Ez eşkena vaja ke ê her diyan zî mîyanê têkoşînî de kesayetîya înan adir ra bîye.

Aslan: Sey çemî bîye

Fermandaranê HPGyî ra Yûsûf Aslanî seba Berçema ke warê Amedî de pîya têkoşîyaybî vat: “Embaza Berçeme mîyanê koma destpêkî de bîye ke serra 2006î de embazanê cinîyan reyde Amedî ra agêraybî. Seba ke koma embazanê cinîyan Warê Şehîde Zîlane ra biresna Hêrema Akdagî ez zî înan reyde bîya. Rewşa aye ya xozayî, huyayîş û otorîteya aye bala mi anitibî. Sey çemêk bîye ke bi çoş û kelecanê aye kar bîyêne pîl. Berçeme pawitişnameyê Rayberîye wendîbî û nêzdîbîyayîşê Rayberî yê xozayî aye ser o tesîr kerdîbî. Xoza seba aye warê cuyêka rindeke bî.”

Yazarın diğer yazıları

    None Found