Strasbûrg ra veng day

Komployê 15ê Sibate ke vera Rayverê Şarê Kurd Abdullah Ocalanî virazîya bi tewrbîyayîşê des hezaran kesan sûka Fransa Strasbûrg de protesto bi. Rexmê hewayê serdin kesê ke welatanê zey Almanya, Swîsre, Awûstûrya, Hollanda, Belçîka û Fransa ra herikyay Strasbûrg serbestîya Ocalanî waştî. Nûmayiş de vajîya ke 2017 do bibo serra serbestîya Ocalanî. 

Nûmayişê protestoyî yê 18. Serragêra Komployê Mîyanneteweyî  roja Şeme (11ê Sibate)  bi rayşîyayîşî destpa kerd. 70 nûmayîşkaranê enternasyonalîst û nûmayişkaranê genc ra pîya bi hezaran Kurdistanijî û dostê ci tewrê rayşîyayîşî bî û sloganê “Bê Serok Ciwîyayîş Nêbeno” berz kerdî.  Rayşîyayîşo ke ver Îstasyonê Tren yê sûk de destpa kerd de panqarta ‘Ocalanî rê Azadî Kurdistanî rê Statu’ abîya û sloganê zey “Bicuwe Serok Apo”, “Kiştox Erdogan” berz bî. 

 Esaretê Ocalanî nîno qebûlkerdiş 

Rayşîyayîş ra dima şêlig resya Meydanê Rue des Vanneaux yê mitîngî. Akerdişê mitîngî de nûmayişkarê enternasyonalî vejyay ser sehneyî, komployê vera Ocalanî şermezar kerdî û Şoreşê Rojawa selamî kerdî. 

Ser nameyê komê enternasyonalîstan Sarah Marcha îzahatê ortexîn wend û vist vîrî ke seba serbestîya Abdullah Ocalanî înan 270 kîlometre rayşîyayîş viraşt. Îzahatî de vajîya ke esaretê Ocalanî nîno qebûlkerdiş û welatanê Awrûpa ra wazîya ke Hereketê Serbestî lîsteyê terorî ra bîro vetiş û polîtîkayanê krîmînalîzekerdişê kurdan ra fek bîro veradayîş. 

Vera qirkerdişî têkoşînê ortex

Azayê Konseyê Rayverîn yê KCK Cemîl Bayikî zî seba mitîngî jû mesaj rûşna û vist vîrî ke vera Komployê Mîyanneteweyî têkoşînê Hereketê Kurd rameno. Bayikî dûştê polîtîkayanê letekerdişî vengê Kongreyê Neteweyî da şarê kurd. Azayê Konseyê Rayverîn yê KCK Cemîl Bayikî aşkere kerd ke pîyakarîya AKP-Erdogan û MHP wazîyena komployî newe ra ganî bikero û hemverê îtifaqê qirkerdişî vengê têkoşînê ortex da şaran. 

Hemserokê Kongra Gel Remzî Kartalî zî mitîngî de qisey kerd û va, ‘Ma dê no wesarî de faşîzmê Erdoganî biqedînê. Kartalî da zonayen ke referandûm seba şaran yew firset o û va, ‘referandûmî de qebûlnêkerdişê ‘YA’yî do seba AKP derbeyeke gird bo. Remzî Kartalî aşkere kerd ke ê hedef kenê ke 2017 de Rayverê Şarê Kurd azad bikerê. 

Mîlano de 10 hezarî meşîyay

Qiseyan ra dima yew sînevîzyon ame damisnayiş û tewr peynî de azayê Koma Berxwedanî vejyay ser sehne û deyranê şoreşî vatî. Tenya Strasbûrg de nê, xêlê cayan de nûmayişî virazîyay. Mîlano de zî des hezarî kes vejyay meydanan.  

 NAVENDÊ XEBERAN 

Yazarın diğer yazıları

    None Found