Tarîxê Amedî yeno çinkerdene

Bajarê Amedî ke tarîx ra nata bîyo merkezê xeylê şaristanan, bi tarîxê xo eleqeyêko gird vîneno. Bajar de sere de Sûr û xeylê cayanê tarîxî her roje meymandarîya bi hezaran merdiman kena. Labelê sûrê ke tarîxê înan bi hezaran serrî yo, seba ke nînî pawitene, rijîyayîş reyde têrî yî.

Arkeologe Nevîn Soyukaya vera naye de reaksîyon nîşan da. Soyukaya daye zanayene ke Wezîrîya Dorme û Bajarvanî bin nameyê ‘ma rast û rind kenî’ de rijnenî. Soyukaya daye vîrî ke Sûrê Amedî 2015 de girîyayî Lîsteya Mîrasê Dinya û wina va: “Ganî biameyêne pawitene. Ewro çarçewaya ‘Bexçeyê Milletî’ de orîjînalîya sûran yenî xirabekerdene. Ewro seba ke Wezîrîye nêpawena, rantwerî ewja de kafe û sewbîna çîyan virazenî. Ganî dezgehê ke berpirsîyar î, wezîfeyê xo bica bîyarî.”

Turkan Yarara ke Sûr de cuyena, dîyar kena ke ê nêwazenî ke tarîxê înan vînî bibo û vana ‘Amed yeno manaya Sûrî û ganî ti kes dest nêdo tarîxê ci’. Cinîyan ra Xanim Koçake va ‘ma verê cû bi hawayo rehet şîyêne Sûr de gêrayêne, labelê ewro heme cayan de kafeyî viraştî’ û wina domnaye: “Merdim her ke wazeno ronîşo, ganî pere bido. Tîya de zaf vîrardişî estî. Eke wina bibo, merdimî nêşênî bêrî tîya.”

Wa êdî dest nêdî sûran

Sûltan Çelîke dana zanayene ke gêrayîşê sûran înan kêfweş keno û ganî kafeyî nêrî viraştene. Cinîyan ra Gulten Ertaşe zî va ‘ganî tarîxê Amedî bêro pawitene’ û wina dewam kerde: “Bi akerdişê kafeyan, merdimî tarîx ra mehrûm veradîyenî. Wa êdî dest nêdî sûran.”

JINNEWS / AMED

Yazarın diğer yazıları

    None Found