Tecrîd nêqedîyo kaos zî nêqedîyeno

7ê Tebaxe ra nata avûkatê Buroyê Huqûqî yê Asrinî nêeşkenê Rayberê Şarê Abdullah Ocalanî reyde pêvînayîş bikerê. Avûkatanê Buroyê Huqûqî yê Asrinî ra Îbrahîm Bîlmezî derheqê tecrîdê Îmrali yê vera Abdullah Ocalanî de ANF ra Zeynep Kûraye rê qisey kerd.

Bîlmezî vist vîrî ke heqo tewr tabîî yo ke avûkatî bieşkî muwekîlê xo bivînê, labelê 7ê Tebaxe ra nata ê her hewte roja Çarşeme û Îne seba zîyaretî muracat kene, la heme muracatê înan bêcewab ameyî qedexekerdene û wina va: “Îmrali de mekanîzmayêko keyfî û bêhuqûqîye esto, merdimî wayîrê heqanê merdimîye yê, ganî herkes bieşkê nê heqanê xo bixebitnê. Labelê wexto ke babete bena Birêz Ocalan çi heyf ke serra 1999 ra nata heqê tabîîyî tim ameyî binpaykerdene. No mekanîzma bi xo tecrîdkerdiş o, tecrîdkerdişê Ocalanî verê Îmrali, Sûrîye de dest pêkerd. Astengkerdişê pêvînayîşê ey ê nikayênî netîceyê nê sîstemê tecrîdî yo. Sîstemê tecrîdî nika zî yeno xebitnayene.”

Bîlmezî dewamê qiseykerdişê xo de da zanayene ke Tirkîya nêbena demokratîke, çimkî bingeyê aye de neçareserkerdişê problemê Kurdan esto. Tirkîya de rejîmê şexsêkî saz bîyo. Problemê Rojawanî zî eleqeyê ci bi problemê Kurdan esto. Rêxistînbîyayîşê alternatîfî yê tevgerê Kurdan Tirkîya eciz kerd. Eke Tirkîya problemê Kurdan çareser bikero û heqanê Kurdan bido înan, ganî nizdîyê rêxistinbîyayîşê Rojawanî nêbo û seba naye her çî ra ver tecrîdê Îmrali biqedêno.”

Bîlmez bale ante kaosê Rojhelato Mîyanên ser û wina va: “Eke wextê xo de seba çareserîyêka aştîyane û demokratîke dormeyê masa de bironiştêne, ewro rewşe cîya bibîyêne. Rojhelato Mîyanên de kaosêk esto, la eke Tirkîya problemê Kurdan bi perspektîfê demokratîkî çareser bikerdêne, beno ke problemê Sûrîye zî çareser bikerdêne. Heta ke tecrîd nêqedîyo, kaos zî nêqedîyeno.”

STENBOL

Yazarın diğer yazıları

    None Found