TGSyî hêrişan şermezar kerd

Badê ke qayûmî tayînê şaredarîyanê Amed, Wan û Mêrdînî bîyî, şar vernîya şaredarîyan de hewl da şaredarîyan bipawo û reaksîyon nîşan bido. Labelê hêzê dewleta Tirkî bi cop, bombeyê gazî, awa tazyîqine û TOMAyan hêrişê şarî kerd. Netîceyê hêrişan de heta nika bi desan kesî tepişîyayî û birîndar bîyî.

Nê hêrişan ra parlamenter û rojnamegerî zî para xo girewtî. Roja dîyine ya çalakîyan de parlamenter Ayşe Acar Başarane zî tede çend sîyasetmedarî derbê polîsan ver, wedarîyayîş nêweşxane. Reyna 10 rojnamegerê mîyanê înan de rojnamegerê bi nameyê Yelda Ozbeke, Ahmet Kanbale, Nûrcan Yalçine, Halîme Parlake, Mehmet Şah Orûç û Rojda Aydine amebî tepiştene.

Temsîlkarê Amedî yê Sendîkaya Rojnamegeranê Tirkîya Mahmût Oralî îzehetêko nuştekî da. Oralî îzehetê xo dayo zanayene ke her problem de îqtîdar ewil hêrişê rojnamegeran keno û wina domna: “Îqtîdarî herinda şaredarîyanê Amed, Wan û Mêrdînî de burokratê xo tayîn kerdî û dima ra protestoyî dest pêkerdî. Netîceyê şîddetê polîsan de bi seyan welatîyî birîndar bîyî û tepişîyayî. Berpirsîyarê nê netîceyê rojnamegerî nîyî. Eke şima nêwazenî çimê dinya de şenik bibî, o wext ganî şima fek derbkerdişê rojnamegeran ra verabidî.”

Veradê, wa rojnamegerî bixebetyî

Oralî dewamê îzehetî de veng dîyayo îqtîdarî ke wa  rojnamegerî bêrî serbest veradayene û wina dewam kerdo: “Ma tena wareyan de karê kontrolî kenî. Helbûk şima herinda ke fek şiddet ra verabidî, şima rojnamegerî tepiştî. Şima nengî çînayî û heqaretê înan kerd. Veradê wa rojnamegerî karê xo bikerî. Ma wazenî ke wa embazê ma serbest bêrî veradayene.”

 MA / AMED

Yazarın diğer yazıları

    None Found