Şervanî ma rumetî ma yê

Sekî yew qomîte de perwerde bîyê, bi aheng, bi yew amancî herb kenî. Sey yew heza dewletî, muradî şaro kurd anî bica.  Kurd şad û bextewar kenî. Sebebo ke têder hereket kenî serekewte yî, muzafer ê.  Netîce de no îtîfaq, yew despêko newe yo. Îtîfaqî pêşmerge û gerîla moral da kurdan, qiwet da kurdan, paya da kurdan. Pardarîya gerîla û pêşmergeyan omîde şarê Kurdistan, azadîya Kurdistan zedîna û her kurd bi na pardarî zaf weşhal bi.  
Oxro, na çend roja operasyona rizgarkerdişî Şengalî û Kobanê him welat de hîm zi teber welat de veng da wera. Cîhane de kes guman nêkerdenê DAIŞ’a har zeft bena.  Axir heza kurd DAIŞ’a efsun da vindarnayiş. Êdî her roj gunî vînî kena, têk şina. Kobanê êdî azade beno.  Şengal de zî bê suk, hemê herdo bejayê û temamî Koye Şengalî, dişmenan ra bi pank. Qase ke yenozanayiş, inkey lejo dijwarkî zêde Taxa Sûka Qeseba, Sûka Jêrîn û Berberojê de dewam keno. Mîjdana bixêr nezdî ya… Nîhayet, herdo pîroz, welato hefreng saya gerîla û peşmerge stare de yo. Şengal û Kobanê mojna kî, kurd ancex têder bo, pewre bo, est o.
Na pardarî mojna, wexta kurd bibo yew, ancex o wext mîyanê ferweranan yenoşiktiş. No herb de esa, têderêbîyayiş yewmendî ya, azadîya.  Şaro kurd saya şervanan xo sîyasete de û dîplomasî de bi zexm. Ayera her kurdo dirûst û xêrwaz bi na qewama gird (yewêtî) zaf bi zerrweş, zaf bi weşhal. La taye est ê, zaf teng bîyê. Sîyaseto qîlerînî kenî. 
Heza parastina kurd, şervanan qic vînenî. Şaro kurd provoke kenî. Kurdistanî rê esaret rewa vînene kî verê xo danî qezencî kurd. Êyî ke Cizîrê de gunî rişna nêy ê.  Nê xêrnêwaz û nîyetxirab heyf ke sey her wext fesadî kenê. Bê tehemulî kenî. Keso nêyar, nêdirust senî wezîfedar bîyo, otewr keno.
Nêy ne rojanê de eynî sey dîkî ser suleyî, gemarî vîrazenê. Êdî nêzanî senî yew fesal bîdî têderêbîyayişîya kurdan. Derheqî pêşmerge û gerîla çîyanê bê manayan nusenî.  Filan ami, bevan şi. Fîlan verê amî, bevan bade amî. Bê tehemulî û fesadî ra êdî nêzanî vajê se. Senî şikenê nê qisanê tewşan bikêrê. Ey bo, şerm o. 
Lobîya hotelî de sîyaset, çend malpere de mesaj nuştiş êdî îtîbar nêdano. Heger şima îtîbar wazenê se kerem bikêrenê Kobanê û Şengal.  Tabî ke tarzî gerîla û pêşmerge cîya yo. Metodî herbî hurdhemînan seypê nîyo, cîya yo. Heyate yîn cîya ya seypê nîya. Bele, gerîla û pêşmerge fedekarîya gird kenî. Welat pawenî. Rihî xo ganî xo danî.  La ma no ferqî gerîla û peşmerge gera bivîn. Pêşmerge maeş geno. Mulkîyetî xo est o. Malbata xo est a. La gerîla…! el însaf. Ez cumle mîn na ya.  Miheqek heq caye xo vîneno. Her kes qase xo yo. Netîce de her dezge qase xizmetî xo paya û îtîbar rageno.

Mistefa ŞAHÎN

Yazarın diğer yazıları

    None Found