Ti hêz nêşêno vernîya şorişî bigîro

Koordînasyonê KJKyî 19ê Temmuze serrgêra Şorişê Rojawanî de îzehetêko nuştekî da. KJKyî dîyar kerdo ke ganî bêro zanayene ke şorişê Rojawanî ewil şorişê zîhnîyetî yo û wina domnayo: “Cinîya ke 5 hezar serrî yo ke rolêk ci rê ameyo dîyarkerdene, no rol bi têkoşînê cinîyanê Kurdan bedilîyayo. Ti hêz nêşêno vernîya xoverdayîşê cinîyan bigîro.”

19ê Temmuza 2012î de Rojawanê Kurdîstanî de şoriş ame îlankerdene û ewro serrgêra 7. ya Şorişê Rojawanî yo. Hemserekîya Konseyê Caardişî yê KCKyî û Koordînasyonê KJKyî serrgêra 7. ya Şorişê Rojawanî ser o îzehetêko nuştekî dayî. KCKyî da zanayene ke serra 8. ya şorişî de ameyo famkerdene ke Rayber Apo tena yê Kurdan nê, rayberê şorişgêrî yê heme şaranê Rojhelatê Mîyanênî yo.

KCKyî îzehetê xo de heme şehîdanê Rojawanî vîr ardo û wina vato: “Şorişê Rojawanî seba heme şaran hêvî awan kerda û mîyanê şaran de şorişê zîhnîyetî viraşto. Ewro sîstemo ke Vakurrojhelatê Sûrîye de ameyo awankerdene seba demokratîkbîyayîşê heme Rojhelatê Mîyanênî bîyo model. Zorê çeteyê DAÎŞ û El Nusra bi destê hêzanê ke mîyanê înan de Ereb, Kurd, Suryanî, Armenî, Durzî, Çeçen û Tirkmenî estî ra ameyo berdene û no hêvî dayo şaran. Çar hetanê dinya ra şorişgêrî ameyî û Rojawan de şehîd kewtî. No zî karakterê şorişî nîşan dano.”

KCKyî dîyar kerdo ke ganî tena şarê Rojhelatê Mîyanênî û hêzê demokrasî nê, her hetê dinya ra hêzê demokrasî wayîrê nê şorişî bivejyî. KCKyî îzehetê xo wina domnayo: “Gerek vera hêrişan de mîyanê piştîdayîşyewbînanî de bibî. Ma sey Tevgerê Azadîye yê Kurdan hertim wayîrê nê şorişî bivejyî. Wa her çar parçeyê Kurdîstanî de şarê ma zî wina bikero. Şorişê Rojawanî û şehîdê şaranê Vakurê Sûrîye do bibî amênê şorişê demokratîke yê Rojhelatê Mîyanênî. Qetîyen têkoşînê şaran do bireso serkewtişî.”

Şorişê Rojawanî şorişê cinîyan o

Koordînasyonê KJKyî zî îzehetêko nuştekî da û serrgêra 7. ya Şorişê Rojawanî pîroz kerda. KJKyî wina vato: “Ma serrgêra şorişê Rojawanî ewil xelqarê şorişî Rayberîya xo rê pîroz kenî û ma vera vîrardişanê şehîdan de rêz gênî. Ganî bêro zanayene ke Şorişê Rojawanî ewila şorişê zîhnîyetî yo û ganî şorişê Rojawanî zî xebatê zîhnîyetî bidomno. Vera heme zehmetîyan de biisrar awankerdişê dezgeh, sîstem, bawerî û girêdayîya amancî zaf muhîm o. No het de xeylê wezîfeyî kewenî mile cinî, ciwan û herkesî ser.”

Goreyê lazimîya komelî aver şono

KJKyî îzehetê xo de va ‘averşîyayîşê ke Rojawan de bîyî, heta ewro resayî merhaleyanê muhîman’ û wina domna: “Xopawitişê cewherî ra heta ekonomîye, weşîye ra heta perwerdeyî, kultur ra heta huqûqî xeylê wareyan de xo rêxistine kerdo. Komel xo goreyê lazimîyan rêxistine keno. Her hetê komelî ra merdimî bê ke ferq bibo, mîyanê sîstemî de ca gênî. Sere de cinîyî, dayîke û ciwanî ma vînenî ke bi hawayêko bidîqet xebatanê xo domnenî.

Bi têkoşînê cinîyanê Kurdan rol bedilîya

KJKyî peynîya îzehetî de wina vato: “Rayberîya ma Şorişê Rojawanî sey şorişê cinîyan şinase kerd. Şorişê Rojawanî bi nê hetê xo hem bala herême û hem zî ya dinya ante. No hetê cinîya Kurdî ra ameyo destpêkerdene. Cinîya ke 5 hezar serrî yo ke keye de ameya esîrgirewtene û karê aye tena welidnayîşê domanan, xizmetê camêrdî û sewbîna koletîye bi, bi têkoşînê cinîyanê Kurdan bedilîyayo. Ti kes, sîstem yan zî îdeolojî nêşêno vernîya ci bigîro. Ma veng danî herkesi ke wa wayîrê Şorişê Rojawanî bivejyî û no het de wezîfeyê xo bikerî.”

ANF

Yazarın diğer yazıları

    None Found