Vera tehdîdan de ganî Kurdî bibî yewe

Partî û tevgeranê ke îttîfaqê Kurdîstanî de ca gênî, vera îxtîmalê hêriş û dagîrkerîya dewleta Tirkî de reaksîyon nîşan da û dîyar kerd ke ganî Kurdî no proses de yewîya xo awan bikerî û qezencanê xo bipawî. Partî û tevgeran da zanayene ke ê senî ke Vakur de vera qayûm û zulmî de bîyî yewe û xover da, ganî seba Rojawanî zî bibî yewe.

Vera îxtîmalê operasyonê dagîrkerkerîye yê dewleta Tirkî de reaksîyonî kêmî nêbenî. Partî û tevgerê ke îttîfaqê Kurdîstanî de ca gênî, dîyar kerd ke beno ke trajedîyê merdimîye bêro cuyayene û seba ke Kurdî vera hêriş û dagîrkerîye de yewîya xo awan bikerî, veng da.

Endamê Tevgerê Azadî Abdullah Bozkûşî da zanayene ke Kurdan vera DAÎŞî de şerêko gird dayo û qezencê girdî dest fînayî û wina vato: “Eke Amerîka xo peyser bianco o wext beno ke do şerêko gird dest pêbikero. Kurdê çar parçeyê Kurdîstanî û Kurdê ke dîyaspora de cuyenî seba pawitişê qezencanê Kurdan ganî yewîya xo awan bikerî. Eke yewîye nêro awankerdene, ma nêşênî qezencanê xo bipawî. Ewro Rojawan binê tehlukeyêko gird de yo. Cok ra ganî Kurdî pîya hereket bikerî.”

Hetkarê Serekê Pêroyî yê Partîya Merdim û Azadî Sedat Doganî zî dîyar kerd ke mudaxale do ti netîce nêdo girewtene û wina va: “Herinda ci de ganî ma rayîranê pîyacuyayîşî bivînî. Ganî têkoşîn seba pîyacuyayîşî bêro dayene. Ewro keyeyê Kurdan bîyo çar parçe û şima do senî keyeyo ke bîyo çar parçe, domananê ci kêfweş bikerî? Eke Tirkîya wazena bextwaştoxan kêfweş bikero, o wext keyeyê Ereban Şam û Heleb o. Vakurê Sûrîye yê Kurdan o. Esatî waşt ewja de kemberê Ereban bido awankerdene, labelê nêtepişt. Ewro zî amanc eynî yo. Eke Kurdî vera nînan de yewîya xo awan bikerî, eşkenî nê tehlukeyan bivindarnî.”

Ganî Kurdî bibî yewe

Serekê Pêroyî yê Partîya Komunîstanê Kurdîstanî Sînan Çîftyurekî zî va ‘îttîfaqê faşîstî yê AKP û MHPyî seba ke îqtîdarê xo bidomnî, şerêko winasî dano destpêkerdene’ û wina dewam kerd: “No şer ra ti kes feyde nêvîneno. Ewro problemê estena dewlete çin o, problemo esasî yê Erdogan û Bahçelîyî yo. Ewro sîyaseto ke esto, ecizîya AKP û MHPyî nîşan dano. Kurdan ser o teslîmîyet yeno ferzkerdene, labelê Kurdî do zorê înan bîşêrî. Bêxera xoverdayîş û têkoşînî ti rayîr vernîya Kurdan de çin o. Kurdan vizêr Kobanê de qezenç kerd, ewro zî do qezenç bikerî.

Ganî ewro seba Rojawanî zî bibî yewe

Çîftyurekî dewamê qiseykerdişê xo de seba yewîya Kurdîstanî veng da û wina va: “Ganî Kurdî heme cayan de wayîrê heqanê xo bivejyî û vera dagîrkerîye de bibî yewe. Kurdî hêrişê kesî nêkenî û tena qezencanê xo pawenî. Senî ke Kurdan seba merdimîye şer kerd û erjê xo pawitî, ganî ewro heme dinya destek bido Kurdan. Seba yewîya Kurdan wexto tewr munasîb nika yo. Ganî Kurdî no proses de yewîya xo awan bikerî û qezencanê xo bipawî. Ma senî ke Vakur de vera qayûm û zulmî de bîyî yewe û xover da, ganî ma seba erdanê Rojawanî zî bibî yewe.

AMED

Yazarın diğer yazıları

    None Found