Vizêr ‘Welatê Me’ ewro ‘Rojeva Medya’

Çapemenîya azade serra 1992 ra heta ewro ceza û dozan ver bi nameyanê cîya cîyayan weşanê xo bi şîyarê ‘raştîyan ra tavîz nîno dayîş’ domnaya. Xebatkarê çapemenîya azade her çiqas ke rastê hêriş, merg û cezayê hepsî zî ameyî resnayîşê raştîyan ra tavîz nêdayî. Na xete bi Apê Musa û Gurbetellî Ersozan dest pêkerda û heta Rohat Aktaşan dewam kerda.Rojnameyê Welat yê bi kurdî 22ê sibata 1992 de dest bi weşanî kerdbî. Rojnameyo ke pêro pîya 115 hûmar vejîya, ceza û dozan ver mecbûr mend weşanê xo vindarna û dima ra zî 20ê teşrîna peyêne ya 1994 de rojname bi nameyê ‘Welatê Me’ reyna weşanê xo domna. Rojnameyê Welatê Me, weşanê xo bi hawayo hewtane domna. Rojnameyê Welatê Me heta 1996 pêro pîya 46 hûmar vejîya û dima ra o zî ame padayîş.

Rojeva Medya 

Badê padîyayîşê rojnameyê Welatê Me, rojnameyê Azadiya Welat dest bi weşanî kerd û reyna bi hawayo hewtane weşanê xo domna. Azadiya Welat 15ê tebaxe 2006 de bi manşetê ‘Çimê şima roşn bibê’ bi hawayo rojane dest bi weşanî kerd. Rojname ceza, doze û vindarnayîşê weşanî ver 24ê adara 2007 de bi nameyê ‘Dengê Welat’, Teşrîna peyêne ya 2008 de bi nameyê ‘Welat’, 16ê nîsana 2009 de bi nameyê ‘Rojev’, 6 gulana 2009 de bi nameyê Hawar, 13ê teşrîna peyêne ya 2009 de bi nameyê ‘Rojev’ û 31ê adara 2010 de reyna bi nameyê ‘Rojev’ vejîya. Tewr peynî semedo ke Azadiya Welat 29ê teşrîna verêne ya 2016 de bi Qerarnameyê Hukmê Qanûnî ame padayîş, 11ê teşrîna peyêne de rojnameyê ‘Rojeva Medya’ dest bi weşanî kerd û nika weşanê xo domneno. 

Bi hezar serran ceza 

Xebatkarê nê rojnameyan hetê hêriş û qetilkerdiş, zaf reyan rastê bi seyan serran cezayan ameyî. Nînan ra bi taybetî Mudurê Karê Nuşteyan Vedat Kurşunî rê 525 serrî ceza ame dayîş. Reyna sewbîna bi desan xebatkarê rojnameyî rastê bi hezaran serran cezayan yê hepsî ameyî. Ewro serrgêra destpêkerdişê rojnameyê ‘Welatê Me’ yo û ewro Rojnameyê Rojeva Medya na xeta çapemenîya azade bi hawayo rojane temsîl keno. Her çiqas ke OHAL û Qerarnameyê Hukmê Qanûnî çapemenîya azade ser o sey şûrê Demoklesî leqîyeno zî, rojnameyê Rojeva Medya weşanê xo bi şîyarê ‘raştîyan ra tavîz nîno dayîş’ bi hawayo qerardarî domneno.   

 NAVENDÊ XEBERAN 

Yazarın diğer yazıları

    None Found